گلوکارہ عابدہ پروین سے متعلق پھیلنے والی خبر افواہ قرار

پاکستان کی عالمی شہرت یافتہ صوفی گلوکارہ عابدہ پروین کی ٹیم نے سوشل میڈیا پر اُن کی صحت سے متعلق گردش کرنے والی خبروں کو مکمل طور پر بے بنیاد قرار دے دیا ہے۔

گزشتہ دنوں سوشل میڈیا پر ایک تصویر وائرل ہوئی تھی، جس میں عابدہ پروین کو وہیل چیئر پر بیٹھے اور اردگرد ڈاکٹروں کے ساتھ دیکھا جا سکتا تھا۔ یہ تصویر وائرل ہونے کے بعد مداحوں میں تشویش کی لہر دوڑ گئی اور لوگوں نے ان کی صحت یابی کے لیے دعائیں کیں۔

تاہم اب گلوکارہ کے آفیشل انسٹاگرام اکاؤنٹ سے جاری بیان میں وضاحت کی گئی ہے کہ یہ تصویر تین ماہ پرانی ہے اور اس وقت لی گئی تھی جب عابدہ پروین معمول کے طبی معائنے کے لیے اسپتال گئی تھیں۔

بیان میں کہا گیا ہے کہ عابدہ پروین الحمدللّٰہ بالکل خیریت سے ہیں اور کسی قسم کی طبی پریشانی میں مبتلا نہیں۔

گلوکارہ کی ٹیم نے مداحوں سے اپیل کی ہے کہ وہ غیر مصدقہ خبریں پھیلانے سے گریز کریں اور صرف تصدیق شدہ ذرائع سے موصول ہونے والی معلومات پر ہی اعتماد کریں۔