اللہ اُن سے محبت کرتا ہے جو حسین سے محبت کرتے ہیں، اداکارہ حنا خان

کینسر کے مرض میں مبتلا ہونے والی بھارتی اداکارہ حنا خان نے یوم عاشور کی مناسبت سے سوشل میڈیا پر پوسٹ کی جس میں انہوں نے زیارتوں پر عراق جانے کی خواہش کا اظہار کیا ہے۔

حنا خان نے یوم عاشور پر حضرت امام حسینؓ اور جانثار ساتھیوں کی عظیم قربانی کو خراج تحسین پیش کرتے ہوئے انسٹاگرام پر اسٹوری شیئر کی۔

اداکارہ نے اپنی اسٹوری میں مزار کے اندرونی حصے کی ویڈیو شیئر کی اور ساتھ ہی یا حسین! اللہ کا شیر لکھا۔

انہوں نے مزید لکھا کہ ’اللہ ان سے محبت کرتا ہے جو حسینؓ سے محبت کرتے ہیں، میرا دل چاہتا ہے میں ابھی نجف جاؤں‘۔

واضح رہے کہ پاکستان سمیت دنیا کے مختلف ممالک میں آج واقعہ کربلا میں حضرت امام حسینؓ ، جانثار ساتھیوں اور اہل خانہ کی وفاداری اور عظیم قربانیوں کو یاد کرتے ہوئے مسلمان انہیں خراج تحسین پیش کررہے ہیں۔