وینا ملک کا بالی وڈ فلموں سے متعلق اہم انکشاف

سابق پاکستانی اداکارہ و میزبان وینا ملک نے انکشاف کیا ہے کہ انہیں اب بھارتی فلم انڈسٹری سے فلموں میں کام کے لئے آفرز موصول ہورہی ہیں۔

وینا ملک حال ہی میں ایک پوڈ کاسٹ میں شریک ہوئیں، جہاں انہوں نے فلم انڈسٹری میں کام کرنے سمیت اپنی زندگی کے حوالے سے مختلف موضوعات پر گفتگو کی۔

اداکارہ کا کہنا تھا کہ بھارت میں جب میری فلموں کی شوٹنگ ہوا کرتی تھی تو بھارتی انتہا پسند تنظیم شیو سینا کے بہت سارے لوگ اسلحہ کے ساتھ آئے ہوتے تھے لیکن میں ان سے راستہ دینے اور اپنی وینیٹی میں جانے کا کہتی تھی۔

انہوں نے کہا کہ میں اپنے فیصلے پر قائم ہوں اور ابھی تک میرا ان باکس بالی وڈ فلم کی آفرز سے بھرا ہوا ہے، بالی وڈ چھوڑنے کے کئی سالوں تک مجھے فلموں کی پیشکش آتی رہیں اور میری ٹیم مجھے کام کرنے کی درخواست کرتی تھی لیکن جب آپ ایک فیصلہ کرلیتے ہیں تو صبر کرنا پڑتا ہے اور یہ اسٹوری لوگوں کو نہیں پتا۔

انہوں نے کہا کہ میں نے اپنی مرضی سے بالی وڈ میں کام کرنا چھوڑا ہے اور مجھے نہیں لگتا میں اس مٹی کی بنی ہوئی ہوں کہ کوئی مجھ سے زبردستی کام کروالے، اگر میں نے کام کرنا چھوڑ دیا تو مطلب چھوڑ دیا۔