ملک میں چھاتی کے کینسر کے سالانہ 90 ہزار نئے کیسز کا انکشاف

کراچی: جناح سندھ میڈیکل یونیورسٹی، کنٹینیونگ میڈیکل ایجوکیشن (سی ایم ای)اور جناح پوسٹ گریجویٹ میڈیکل سینٹر کے سرجیکل ڈیپارٹمنٹ 'یونٹ 4' اور پاکستان اسلامک میڈیکل ایسوسی ایشن (پیما)کے تعاون سے حال ہی میں جے ایس ایم یو کیمپس میں چھاتی کے کینسر کی آگاہی کانفرنس کا انعقاد کیا گیا۔

کانفرنس کا مقصد پاکستانی خواتین میں بریسٹ کینسر کی بلند شرح سے آگاہی پیدا کرنا تھا، جو دنیا بھر میں 9 میں سے 1 خاتون کو متاثر کرتا ہے۔ بریسٹ کینسر دنیا بھر میں خواتین میں سب سے عام کینسر ہے، خاص طور پر کم اور درمیانی آمدنی والے ممالک میں، جہاں 2040 تک اس کی شرح میں نمایاں اضافہ متوقع ہے۔

 پاکستان میں ایشیائی ممالک میں بریسٹ کینسر کی شرح سب سے زیادہ ہے اور جنوبی ایشیائی ممالک کی نسبت اس بیماری سے اموات کی شرح بھی بہت زیادہ ہے۔

جے ایس ایم یو کے وائس چانسلر پروفیسر امجد سراج میمن نے کہا"بریسٹ کینسر کے خلاف جنگ میں جلد تشخیص اور آگاہی انتہائی اہم ہیں،" اس کانفرنس کے ذریعے، ہم خواتین کو یہ علم اور اوزار فراہم کرنا چاہتے ہیں کہ وہ خود اپنا معائنہ کریں اور بروقت طبی مدد حاصل کریں، جس سے علاج کے نتائج اور زندگی کے معیار کو بہتر بنایا جا سکتا ہے۔

کانفرنس میں بریسٹ کینسر کے خطرے کے عوامل پر تعلیمی سیشن شامل تھے، ساتھ ہی بریسٹ کینسر اسکریننگ پروگرامز اور جلد تشخیص کے فوائد پر بھی روشنی ڈالی گئی۔

 شرکا کو ماہانہ بنیاد پر خود سے چھاتی کا معائنہ کرنے کی ترغیب دی گئی، جس میں انہیں ماہواری کے حساب سے بہترین وقت کے بارے میں رہنمائی فراہم کی گئی۔

"بریسٹ کینسر ایک قابل علاج بیماری ہے، خاص طور پر اگر جلد تشخیص ہو جائے،" جے پی ایم سی کی کنسلٹنٹ اور جے ایس ایم یو کی ایسوسی ایٹ پروفیسر ڈاکٹر سیدہ زرین رضا نے کہا۔ "زیادہ آگاہی اور اسکریننگ تک رسائی کے ذریعے، ہم ہر سال پاکستان میں ہزاروں زندگیاں بچا سکتے ہیں۔

"ڈائریکٹر سی ایم ای ڈاکٹر راحت ناز نے کہا، "بریسٹ آگاہی کانفرنس جے ایس ایم یو کی جانب سے ملک میں بریسٹ کینسر کے بڑھتے ہوئے بوجھ سے نمٹنے کی جاری کوششوں کا حصہ ہے، جہاں سالانہ 40,000 سے زائد خواتین اس بیماری سے جان کی بازی ہار جاتی ہیں اور ہر سال تقریبا 90,000 نئے کیسز رپورٹ ہوتے ہیں۔