پاکستانی اداکار کا بھارتی میڈیا سے نظر انداز کرنے کا شکوہ

پاکستانی اداکار اور معروف ڈیزائنر حسن شہریار نے شکوہ کیا ہے کہ ہم بھارتی فنکاروں اور شخصیات کو دکھاتے ہیں مگر وہ ہمیں نظر انداز کرتے ہیں۔

ایک پوڈ کاسٹ میں گفتگو کرتے ہوئے حسن شہریار نے کہا کہ ہمارے اشتہارات میں بھارتی شخصیات تو نظر آتی ہیں اور انہیں یہاں کوریج بھی ملتی ہے مگر بھارت میں پاکستانی اداکاروں، فنکاروں کو توجہ نہیں دی جاتی۔

انہوں نے کہا کہ میں کسی کے خلاف نہیں البتہ اس بات کا قائل ہوں کہ اگر عزت لیتے ہو تو عزت دینا بھی سیکھو، اسی وجہ سے مجھے سچ بولتے وقت کبھی پرواہ بھی نہیں رہی۔

اداکار اور ڈیزائنر نے کہا کہ ہمیں پاکستان کے نوجوانوں کو پروموٹ کرنا چاہیے۔ میرے لیے پاکستان سے بڑھ کر کچھ نہیں ہے۔ میں چاہتا تو دنیا کے کسی بھی ملک میں رہ سکتا تھا لیکن مجھے اپنے ملک سے محبت ہے۔