حمیرا کا واٹس ایپ فروری میں بھی استعمال ہوا، اسٹائلسٹ کے تہلکہ خیز بیان کے بعد پولیس تفتیش کا رخ تبدیل

ماڈل و اداکارہ حمیرا اصغر کے اسٹائلسٹ نے نیا دعویٰ کیا ہے جس کے بعد پولیس نے تحقیقات کا دائرہ مزید وسیع کردیا۔

انہوں نے پولیس کو اپنے بیان میں تہلکہ خیز انکشاف کرتے ہوئے بتایا کہ اداکارہ کا فون، سوشل میڈیا 5 فروری کے بعد بھی استعمال ہوا تھا۔

دانش کے مطابق  حمیرا سے ان کی  آخری بات چیت 2 اکتوبر کو ہوئی تھی، تاہم ان کے واٹس ایپ پر لاسٹ سین کی تاریخ 7 اکتوبر 2024ء کی تھی۔ اس کے بعد متعدد بار ان سے رابطہ کرنے کی کوشش کی، کال اور پیغامات بھیجے جو کبھی پڑھے نہیں گئے۔

انہوں نے کہا کہ جب کئی ماہ تک اداکارہ کے حوالے سے کوئی خبر سامنے نہ آئی تو ان کے لاپتہ ہونے سے متعلق سوشل میڈیا پر پوسٹ لگانے کا فیصلہ کیا۔

 اسٹائلسٹ دانش مقصود نے بتایا کہ سوشل میڈیا پر پوسٹ شیئر کرنے سے پہلے حمیرا کے موبائل نمبر پر ایک مرتبہ پھر رابطہ کرنے کی کوشش کی لیکن ناکامی ہوئی تو 5 فروری کو سوشل میڈیا پر پوسٹ شیئر کی۔ انہوں نے کہا کہ 5 فروری کو پوسٹ لگانے کے بعد اگلے دن پھر رابطہ کیا تو اداکارہ کے واٹس ایپ سے ناصرف ان کی ڈی پی غائب تھی بلکہ ان کا لاسٹ سین بھی بند کردیا گیا تھا۔

اس حوالے سے ڈی آئی جی ساؤتھ اسد رضا کا کہنا تھا کہ اسٹائلسٹ دانش سے رابطہ کیا ہے، ان سے تمام اسکرین شاٹس لیکر اس سے متعلق مزید تحقیقات کا آغاز کر دیا گیا ہے۔