کراچی کا انتہائی باصلاحیت کانٹینٹ کریئٹر، جو صرف ایک موبائل سے سب کرتا ہے

کراچی کے پسماندہ علاقے بلدیہ ٹاؤن، کے ایک چھوٹے سے گھر میں بیٹھا 16 سالہ طلحہ احمد، صرف اپنے موبائل فون سے ایسی ویڈیوز بناتا ہے جو لاکھوں دلوں کو چھو رہی ہیں۔ کامیڈی کا یہ نوجوان اسٹار پاکستان کے مقبول ترین ٹین ایج کامیڈینز میں اپنی جگہ بنا چکا ہے۔

صرف ایک سال کے عرصے میں طلحہ نے 324,000 سے زائد فالوورز حاصل کیے، جبکہ اس کی ایک ویڈیو نے 20 ملین سے زیادہ ویوز کا ریکارڈ توڑا۔ مگر یہ سفر اتنا آسان نہیں تھا – طلحہ کے پاس نہ مہنگا کیمرہ تھا، نہ پروفیشنل سیٹ اپ، صرف ایک عام سا موبائل فون اور بے پناہ تخلیقی صلاحیت۔

سادہ موضوعات، زبردست رسپانس

طلحہ کی کامیڈی کا راز اس کی ویڈیوز کے موضوعات میں چھپا ہے۔ وہ عام پاکستانی گھروں میں پیش آنے والے مزاحیہ لمحے دکھاتا ہے جن سے ہر کوئی جُڑ سکتا ہے۔ ایک مشہور ویڈیو میں وہ ایسے فرد کا کردار ادا کرتا ہے جو سحری میں سوتا رہتا ہے، روزہ نہیں رکھتا لیکن افطاری پر سب سے پہلے پہنچتا ہے – اس ویڈیو نے لاکھوں لوگوں کو خوب ہنسایا۔

ایک اور مقبول ویڈیو میں وہ عید سے پہلے درزیوں کے رویے پر طنز کرتا ہے، خاص طور پر وہ مشہور جملہ "ابھی تو بٹن لگنا باقی ہے"۔ اس ویڈیو نے ہر اس شخص کو یاد دلا دیا جسے درزی کے جھوٹے وعدوں کا سامنا کرنا پڑا۔

بالی وڈ پر طنز، سہیل وریچ کی پیروڈی

طلحہ کی ایک ویڈیو جس میں اُس نے بالی وڈ فلموں میں مسلمانوں کی روایتی پیشکش پر طنز کیا، سوشل میڈیا پر وائرل ہو گئی۔ اس نے مختلف کرداروں کی شاندار نقل کی اور دیکھنے والوں کو خوب ہنسایا۔

اسی طرح، اینکر سہیل وڑائچ کے انداز میں ایک مزاحیہ ویڈیو پر لوگوں نے یہاں تک کہہ دیا: “سہیل صاحب کو بھیج دو، خود مان جائیں گے کہ نقل اصل سے بہتر ہے!”

کامیابی کے پیچھے بھائی کا ہاتھ

طلحہ کے بڑے بھائی ڈاکٹر طحہ احمد اس کی ویڈیوز کے پیچھے ایک مضبوط سپورٹ سسٹم ہیں۔ وہ اسکرپٹس بہتر کرتے ہیں اور ویڈیوز کی ریکارڈنگ میں مدد دیتے ہیں۔ ان کا کہنا ہے کہ طلحہ نے اپنا سفر اُس وقت شروع کیا جب اس کے پاس ذاتی موبائل فون بھی نہیں تھا – وہ کبھی بہن کا اور کبھی بھائی کا فون استعمال کرتا تھا۔

زندگی کا چیلنج، لیکن حوصلہ بلند

طلحہ ایک اہم بیماری تھیلیسیمیا کا مریض ہے، لیکن اس نے کبھی اسے اپنی راہ میں رکاوٹ نہیں بننے دیا۔ انہوں نے کہا کہ آج الحمدللہ، میری پہچان میرا کام ہے، میری بیماری نہیں۔

خواب روشن، منزل قریب

اب جب کہ طلحہ نے میٹرک کے امتحانات دے دیے ہیں، وہ اپنی تعلیم اور آن لائن کامیڈی کیریئر کے درمیان توازن قائم کر رہا ہے۔ اس کا خواب ہے کہ وہ پاکستان کی کامیڈی انڈسٹری میں ایک نمایاں نام بنے، اور اس کے چاہنے والے ہر نئی ویڈیو کا شدت سے انتظار کرتے ہیں۔

طلحہ احمد – ایک مثال کہ جذبہ، تخلیقیت اور محنت سے کچھ بھی ممکن ہے۔