نظر لگنے کا ڈر؟ عالیہ بھٹ نے بیٹی کی تمام تصاویر ڈیلیٹ کردیں

بالی ووڈ اداکارہ عالیہ بھٹ نے اپنی بیٹی راہا کی تمام تصاویر سماجی رابطے کی ویب سائٹ انسٹاگرام سے ڈیلیٹ کردی ہیں۔ جس کے بعد مختلف قیاس آرائیاں شروع ہو گئی ہیں۔

عالیہ کے اس فیصلے پر سوال اٹھایا جا رہا ہے کہ کیا یہ اقدام حال ہی میں پیش آنے والے سیف اور جے کے واقعے کی وجہ سے کیا گیا ہے؟ تاہم، عالیہ بھٹ نے واضح کیا ہے کہ انہوں نے اپنی بیٹی کی پرائیویسی کو مدنظر رکھتے ہوئے یہ فیصلہ کیا ہے۔

اداکارہ نے طے کیا ہے کہ وہ اب اپنی بیٹی راہا کی تصاویر سوشل میڈیا پر پوسٹ نہیں کریں گی۔ اسی فیصلے کے تحت انہوں نے پچھلی تمام تصاویر بھی ہٹا دی ہیں۔

عالیہ کے مداحوں نے اس فیصلے کی حمایت کی ہے اور اسے رازداری کی ایک درست مثال قرار دیا ہے۔ عالیہ بھٹ کے انسٹاگرام اکاؤنٹ پر فینز نے محسوس کیا کہ راہا کی تمام تصاویر ہٹا دی گئی ہیں، سوائے ان تصاویر کے جن میں راہا کا چہرہ نظر نہیں آ رہا ہے۔

اداکارہ نے بیٹی کی خاندانی ٹرپس کی تصاویر بھی ہٹا دی ہیں، جبکہ نئے سال کے البم میں صرف وہ تصاویر موجود ہیں جن میں راہا کا چہرہ نہیں دکھایا گیا ہے۔ 

انٹرنیٹ صارفین میں سے کچھ نے راہا کی تصاویر ہٹانے پر تنقید کی، لیکن زیادہ تر نے اس اقدام کو درست قرار دیا۔

صارفین کا کہنا تھا کہ بچوں اور ان کے والدین کی پرائیویسی کا خیال رکھنا چاہیے۔ ایک صارف نے لکھا، "بچوں کو سوشل میڈیا کی روشنی میں لانے سے پہلے والدین کو سوچنا چاہیے۔ عالیہ کا فیصلہ قابل تعریف ہے۔"

2022ء میں پیدا ہونے والی راہا اس وقت ڈھائی سال کی ہیں۔ عالیہ بھٹ اور ان کے شوہر رنبیر کپور نے اپنی بیٹی کو 2023ء میں میڈیا کے ذریعے دنیا کے سامنے پیش کیا تھا۔ تاہم، اب عالیہ نے بیٹی کی پرائیویسی کو ترجیح دیتے ہوئے اس کی تصاویر سوشل میڈیا سے ہٹانے کا فیصلہ کیا ہے۔