برطانیہ میں تعینات پاکستانی سفیر نے جنگ بندی کے ساتھ مسئلہ کشمیر کا بھی معاملہ اٹھا دیا

پاکستان اور بھارت کے درمیان پرتشدد جھڑپوں میں نمایاں کمی کے بعد، پاکستان کے برطانیہ میں ہائی کمشنر ڈاکٹر محمد فیصل نے امید ظاہر کی کہ جنگ بندی برقرار رہے گی اور کشمیری عوام کے حق خودارادیت کو پورا کیا جائے گا۔  

برطانوی میڈیا کو انٹرویو دیتے ہوئے ڈاکٹر فیصل نے زور دے کر کہا کہ جنوبی ایشیا میں خطے کی استحکام کا براہ راست تعلق کشمیر کے مسئلے کے حل سے ہے، جو اقوام متحدہ کے چارٹر اور کشمیری عوام کی خواہشات کے مطابق ہونا چاہیے۔  

انہوں نے کشمیر کی آزادی کے لیے پاکستان کی غیرمتزلزل حمایت کا اعادہ کرتے ہوئے کہا کہ بھارت کشمیری عوام کے جائز مطالبات اور مرضی کو مسلسل نظرانداز کرتا رہا ہے۔  

ڈاکٹر فیصل نے پاکستان اور بھارت کے درمیان بڑھتی ہوئی کشیدگی کو کم کرنے میں تعمیری کردار ادا کرنے پر امریکہ، سعودی عرب اور دیگر طاقتوں کا بھی شکریہ ادا کیا۔  

بھارت کے زیرِغیرقانونی قبضہ جموں و کشمیر (IIOJK) میں حالیہ پہلگام واقعے پر بات کرتے ہوئے، انہوں نے اس بات کی تصدیق کی کہ پاکستان بھارت کے ساتھ تعاون کے لیے تیار ہے، بشرطیکہ اس معاملے کی بین الاقوامی سطح پر تحقیقات کی جائے۔  

انہوں نے زور دے کر کہا کہ حملے میں ملوث افراد کو قانون کے مطابق سزا دلائی جانی چاہیے اور بھارت سے مطالبہ کیا کہ وہ سرحد پار دہشت گردی کے اپنے الزامات کو ثابت کرنے کے لیے قابل اعتماد اور ٹھوس شواہد پیش کرے۔