سیز فائر کے بعد بھارت نے پھر اوقات دکھا دی، لائن آف کنٹرول پر شہری آبادی پر شدید فائرنگ

بھارت نے سیز فائر معاہدے کی خلاف ورزی کرتے ہوئے آزاد کشمیر کے ضلع بھمبھر کی شہری آبادی پر بلااشتعال فائرنگ کی ہے جس پر پاکستان نے بھرپور جواب دیا ہے۔

پاک فوج نے لائن آف کنٹرول کی خلاف ورزی پر بھارت کو بھرپور جواب دیتے ہوئے دشمن کی توپوں کو خاموش کروادیا تاہم ایک بار پھر علاقے میں کشیدگی پھیل گئی ہے۔

ذرائع کا کہنا ہے کہ دونوں ممالک کے درمیان سیز فائر معاہدہ ہونے کے باوجود پاک فوج کے جوانوں کو الرٹ رہنے کی ہدایت ہے تاکہ دشمن کی کسی بھی مہم جوئی کا بھرپور جواب دیا جائے۔

سیکیورٹی ذرائع کے مطابق دشمن فورسز کی جانب سے برنالہ اور چھمب سیکٹر پر شدید گولہ باری کی گئی۔ جس کی وجہ سے متعدد دیہات متاثر ہوئے۔

سرحدی علاقوں میں ہنگامی حالت، لوگوں کو محفوظ مقامات پر منتقل کیا جا رہا ہے جبکہ دفاع وطن کے لیے پاک فوج ہر دم تیار ہے اور دشمن کو بھرپور جواب دے رہی ہے۔