9 مئی کیسز میں عمران خان بڑی مشکل میں پھنس گئے

پنجاب کی خصوصی استغاثہ نے سانحہ نو مئی کیسز میں اپنے دلائل مکمل کرتے ہوئے پاکستان تحریک انصاف کے بانی چیئرمین عمران خان کو مرکزی ملزم قرار دے دیا۔

تفصیلات کے مطابق انسداد دہشت گردی عدالت لاہور میں 9 مئی جلاؤ گھیراؤ کے مختلف 7 مقدمات میں عمران خان کی عبوری ضمانتوں کی درخواستوں پر سماعت ہوئی، جس میں اسپیشل پراسیکیوٹر رانا شکیل نے بانی چیئرمین پی ٹی آئی عمران خان کو 9 مئی کے مقدمے کا مرکزی ملزم قرار دے دیا ۔

اسپیشل پراسیکیوٹر نے عدالت میں دعویٰ کیا کہ گواہوں کے اس حوالے سے بیانات ریکارڈ پر ہیں جس کے مطابق عمران خان نے وزیراعظم ہاؤس اور فوجی تنصیبات جلانے کا حکم دیا، استغاثہ کی جانب سے گواہوں کے بیانات عدالت میں پڑھ کر سنائے گئے۔

عدالت نے استفسار کیا کہ کیا بانی پی ٹی آئی نے عوام کو اداروں کے خلاف حملہ کرنے کا کوئی ٹوئٹ کیا ، جس پر اسپیشل پراسیکیوٹر نے بتایا کہ جی ہاں بہت سے ٹوئٹس اور انسٹاگرام پر پیغامات ہیں ۔ بانی پی ٹی آئی نے عوام کو سڑکوں پر نکلنے کا کہا ۔

واضح رہے کہ عدالت نے جیل سے بانی پی ٹی آئی کی ویڈیو لنک پر حاضری لگوانے کی ہدایت کررکھی ہے اور بانی پی ٹی آئی کے وکلا سے دلائل بھی طلب کررکھے ہیں ۔ بانی چیئرمین پی ٹی آئی کے خلاف جناح ہاؤس ، عسکری ٹاور جلاؤ گھیراؤ سمیت 7 مقدمات درج ہیں۔