عمران خان کی صحت کے حوالے سے اڈیالہ جیل انتظامیہ کا جواب غیر تسلی بخش قرار

اسلام آباد ہائیکورٹ نے پاکستان تحریک انصاف کے بانی چیئرمین عمران خان کی طبی معائنے کی درخواست پر اڈیالہ جیل حکام کے جواب غیر تسلی بخش قرار دے دیا ہے۔

اسلام آباد ہائیکورٹ میں بانی پی ٹی آئی کے شوکت خانم اسپتال کے ڈاکٹر سے معائنہ کروانے کیلیے دائر درخواست پر سماعت ہوئی۔ اس دوران اڈیالہ جیل کی انتظامیہ نے اپنا جواب جمع کرایا۔

اسلام آباد ہائیکورٹ کے جج جسٹس میاں گل حسن اورنگزیب نے ریمارکس میں جیل حکام اور اسٹیٹ کونسل کے عمران خان کے طبی معائنے کے حوالے سے جمع کرائے گئے جواب کو غیر تسلی بخش قرار دیا اور کہا کہ یہ رویہ ناقابل تعریف ہے۔

اڈیالہ جیل انتظامیہ اور اسٹیٹ کونسل نے اپنے جواب میں کہا تھا کہ جیل میں طبی معائنے کے لیے ڈاکٹرز موجود ہیں جہاں ہفتے میں تین بار بانی پی ٹی آئی کا معائدنہ ہوتا ہے جبکہ ملاقاتوں پر 25 اکتوبر تک پنجاب حکومت نے پابندی عائد کی ہے۔

اس دوران بانی پی ٹی آئی کے وکیل نے کہا کہ عمران خان مجرم نہیں بلکہ ملزم ہیں اور اُن کے خلاف مقدمہ زیر سماعت ہے،جنگوں میں بھی ڈاکٹروں کو معائنہ کی اجازت ہوتی ہے۔

جسٹس میاں گل حسن اورنگزیب نے اسٹیٹ کونسل سے کہا کہ انکی درخواست کو دیکھیں ،آپ لوگوں کا رویہ قابل تعریف نہیں ہے ، میں اس پر آرڈر جاری کروں گا۔