عمران خان نے جنید اکبر سے بڑی قربانی مانگ لی، پی ٹی آئی رہنما کا فوری لبیک

لاہور: پاکستان تحریک انصاف (پی ٹی آئی) کے بانی عمران خان نے پارٹی رہنما جنید اکبر کو پبلک اکاؤنٹس کمیٹی (پی اے سی) کی چیئرمین شپ سے دستبردار ہونے کی ہدایت جاری کردی۔  

ذرائع کے مطابق، عمران خان کی بہن علیمہ خان نے پارٹی قیادت کو بانی چیئرمین کا تحریری پیغام پہنچایا ہے، جس میں جنید اکبر سے پی اے سی کی ذمہ داری چھوڑ کر خیبر پختونخوا سے تحریکِ احتجاج کو مکمل توجہ دینے کی ہدایت کی گئی ہے۔  

عمران خان کا کہنا ہے کہ پی اے سی چیئرمین شپ اور تحریک کی ذمہ داریاں ایک ساتھ نبھانا مشکل ہوگا  

پی اے سی کی چیئرمین شپ عمر ایوب خان کو سونپے جانے کا امکان  

جنید اکبر کا کہنا ہے کہ وہ بانی چیئرمین کی ہدایت پر فوری عمل کریں گے  

پارٹی سیکرٹری جنرل سلمان اکرم راجہ نے معاملے کو "پارٹی کا اندرونی معاملہ" قرار دیتے ہوئے تبصرہ کرنے سے گریز کیا  

تحریک پر مکمل توجہ کی ہدایت

علیمہ خان کے مطابق، عمران خان نے جنید اکبر کو واضح ہدایت کی ہے کہ وہ اپنی پوری توانائی خیبر پختونخوا سے شروع ہونے والی تحریک پر مرکوز کریں، جس کا بنیادی مقصد پارٹی رہنماؤں اور کارکنوں کی رہائی کے ساتھ ساتھ انتخابی دھاندلی کے خلاف آواز بلند کرنا ہے۔  

پی ٹی آئی کے اندرونی ذرائع کے مطابق، یہ فیصلہ اس حکمت عملی کا حصہ ہے جس کے تحت پارٹی اپنی تمام تر توانائی موجودہ سیاسی بحران کے خلاف عوامی تحریک کو منظم کرنے پر صرف کرنا چاہتی ہے۔