بانی پی ٹی آئی کی رہائی تک اسلام آباد میں رہیں، مذاکرات عمران خان کے باہر آنے پر ہوں گے، گنڈا پور

وزیرِ اعلی خیبر پختونخوا علی امین گنڈاپور  نے کہا ہے کہ عمران خان کی رہائی تک اسلام آباد میں رہیں گے اور  حکومت سے مذاکرات کا آغاز بانیٔ پی ٹی آئی کی رہائی کے بعد ہو گا۔

نجی ٹی وی سے بات کرتے ہوئے وزیراعلیٰ  نے کہا کہ بانی پی ٹی آئی کا جو حکم ملا ہے اس پر ہر صورت میں عمل کروں گا، میرا اختیار بانی پی ٹی آئی کے پاس ہے جو وہ کہیں گے کروں گا۔ انہوں نے کہا کہ میں اور پی ٹی آئی کارکن ہر صورت میں ڈی چوک پر پہنچیں گے، بانیٔ پی ٹی آئی اور دیگر قیدیوں کی رہائی اور مطالبات کی منظوری تک اسلام آباد میں رہیں گے۔

وزیرِ اعلیٰ گنڈا پور نے کہا کہ گزشتہ احتجاج میں بھی راستے بند ہونے کے باوجود اسلام آباد پہنچے تھے۔ وفاق اور پنجاب حکومت نے بوکھلاہٹ میں موٹر وے اور شاہراہیں بند کر دی ہیں، ہمارا احتجاج پُرامن ہے۔

انہوں نے یہ بھی کہا کہ حکومت ملک کو بلاک کر کے عوام کو تکلیف پہنچا رہی ہے۔