بشری بی بی کی طبیعت ناساز ہوگئی، کان سے خون بہنے لگا

سابق وزیراعظم اور بانی پی ٹی آئی عمران خان کی اہلیہ بشریٰ بی بی کی رہائی کے بعد طبیعت ناساز ہوگئی اور کان سے خون بہنے لگا ہے۔

شوکت خانم اسپتال کے ڈاکٹرز نے وزیراعلیٰ ہاؤس پشاور میں بشریٰ بی بی کا طبی معائنہ کیا جس کے دوران انکشاف ہوا کہ سابق خاتون اوّل کے دانتوں میں انفیکشن ہیں اور اس وجہ سے اُن کے کانوں سے بھی خون بہہ رہا ہے۔

ترجمان بشری بی بی نے بتایا کہ ڈاکٹرز کی ہدایت پر اُن کے مزید ٹیسٹ بھی ہوں گے۔

واضح رہے کہ بشریٰ بی بی 9 ماہ کی قید کے بعد گزشتہ روز توشہ خانہ 2 ریفرنس میں ضمانت منظور ہونے کے بعد رہا ہوئیں اور پھر انہیں پشاور وزیراعلیٰ ہاؤس منتقل کردیا گیا تھا۔