دو فیصلوں کے بعد عدالتی نظام دفن ہوگیا، علیمہ خان

پاکستان تحریک انصاف کے چیئرمین عمران خان کی بہن علیمہ خان نے توشہ خانہ ریفرنس کے فیصلے پر ردعمل دیتے ہوئے کہا ہے کہ دو دن میں دو فیصلوں کے بعد جوڈیشل سسٹم نے خود کو دفن کردیا۔

راولپنڈی میں اڈیالہ جیل کے باہر میڈیا سے گفتگو کرتے علیمہ خان کا کہنا تھا کہ ہمارے وکلا ہمیں جواب دیں انہوں نے کہا تھا بار کونسلز اور اسوسی ایشنز انصاف کے لیے کھڑی ہوں گی، پہلے تو وکلا ہمیں بتائیں کہ یہ ججز کو انہی سے اٹھ کر بنائے جاتے ہیں تو انکو کیوں نہیں دیکھا جاتا، انہوں نے کیوں نہیں دیکھا کہ ہمیں انصاف دلا سکیں گے کہ نہیں۔

علیمہ خان نے کہا کہ بانی پی ٹی آئی نے پورے سسٹم کو بے نقاب کیا کیا ہے، وکلاء ہمیں جواب دیں یہ کس قسم کے ججز آئے ہیں، ہم نے سمجھا تھا بار کونسلز اور وکلا تنظیمیں ان سب معاملات پر نظر رکھتے ہیںز کوئی کیوں نہیں بول رہا سب اپنی اپنی انتخابی مہم چلا رہے ہیں۔ 

انہوں نے کہا کہ سائفر کیس میں سب نے دیکھا ہے کہ سابق وزیراعظم اور سابق وزیرخارجہ کے ساتھ جج کیسے برتاو کررہا تھا، دو فیصلوں کے بعد ہمیں 8 فروری کو مزید جوش سے نکلنا چاہیے، بہت منظم انداز میں، لوگ ووٹ کے لیے نکلیں گے، ایک ووٹ کی کوئی قیمت نہیں ہوسکتی، یہ ہماری ذمہ داری ہے ووٹ کسی کو بھی ڈال دیں لیکن ہمیں ووٹ ڈالنا ہوگا۔

علیمہ خان نے کہا کہ تمام سیاسی جماعتیں صرف واویلا کررہی ہیں ان کو پتا چل گیا ہے لوگ کس کے ساتھ ہیں، جماعت اسلامی کا کیا حال کردیا ہے، مولانہ مودودی کتنے بڑے انسان تھے، عمران خان کا صرف جیل میں رہنا ہی ان کے لیے شرمندگی ہے یہ اتنے شرمندہ ہوں گے کے بولنے کے قابل نہیں ہیں۔