کوہاٹ میں سیکیورٹی چیک پوسٹ پر حملے میں 4 شہید

بدھ کی رات گئے ضلع کوہاٹ میں انڈس ہائی وے پر لاچی ٹول پلازہ کے قریب پولیس چوکی پر دہشت گردوں کے حملے میں تین پولیس اہلکار شہید جب کہ ایک شہری جاں بحق ہوگیا۔

 رات گئے دس سے زیادہ دہشت گردوں نے چیک پوسٹ پر حملہ کیا، پولیس کی جوابی کارروائی میں چار دہشت گرد ہلاک ہوگئے۔

 شہید ہونے والوں میں لانس نائیک کانسٹیبل امجد، لانس نائیک کانسٹیبل جنید اور کانسٹیبل وقار شامل ہیں۔ 

 حملے میں لکی مروت کا رہائشی نور محمد بھی مارا گیا۔حملے کی اطلاع ملتے ہی پولیس کی بھاری نفری جائے وقوعہ پر پہنچ گئی اور شرپسندوں کی گرفتاری کے لیے سرچ آپریشن شروع کر دیا۔

 یہ حملہ خیبرپختونخوا کی تحصیل ماموند میں پولیو ڈیوٹی پر مامور پولیس اہلکاروں کو لے جانے والی گاڑی کو نشانہ بنائے جانے کے دو روز بعد ہوا ہے۔ واقعے میں سات پولیس اہلکار شہید ہوئے۔

 اسی روز ایک اور واقعے میں شمالی وزیرستان میں سیکیورٹی فورسز اور شدت پسندوں کے درمیان فائرنگ کے تبادلے میں ایک فوجی شہید جب کہ ایک زخمی شدت پسند کو گرفتار کر لیا گیا۔

گزشتہ روز ہی بنوں میں بھی دہشت گردوں نے پولیو ٹیم کی حفاظت پر مامور اہلکاروں پر فائرنگ کی، جس میں تین اہلکار شہید ہوگئے تھے۔