مصدقہ اطلاعات ہیں بھارت 36 گھنٹوں میں پاکستان پر حملہ کرے گا، وزیر اطلاعات

وفاقی وزیر اطلاعات عطاء اللہ تارڑ نے ایک خصوصی بیان میں کہا ہے کہ پاکستان کے پاس مستند انٹیلی جنس اطلاعات ہیں کہ بھارت اگلے 24 سے 36 گھنٹوں میں پہلگام واقعے سے منسوب بے بنیاد الزامات کو بنیاد بنا کر پاکستان کے خلاف فوجی کارروائی کر سکتا ہے۔

رات گئے ہنگامی جاری کردہ ویڈیو ںیان انہوں نے واضح کیا کہ پاکستان بھارت کے "مدعی، منصف اور جلاد" کے خود ساختہ کردار کو سختی سے مسترد کرتا ہے۔  

عطا تارڑ نے کہا کہ پاکستان خود گزشتہ دو دہائیوں سے دہشت گردی کا شکار رہا ہے اور وہ کسی بھی شکل میں دہشت گردی کی مذمت کرتا ہے۔

 انہوں نے زور دیا کہ پہلگام حملے کے بعد پاکستان نے ذمہ دار ریاست ہونے کے ناطے غیر جانبدارانہ تحقیقات کی پیشکش کی، لیکن بھارت نے تصادم کا راستہ اختیار کیا، جو خطے کے لیے تباہ کن ہو سکتا ہے۔  

انہوں نے کہا کہ بھارت کا غیر جانبدارانہ تحقیقات سے فرار اس کے اصل مقاصد کو بے نقاب کرتا ہے۔ سیاسی مقاصد کے لیے عوامی جذبات بھڑکا کر فیصلے کرنا افسوسناک ہے۔

 پاکستان نے واضح کیا کہ وہ بھارت کی کسی بھی فوجی مہم جوئی کا فیصلہ کن جواب دے گا اور بین الاقوامی برادری کو یہ سمجھنا چاہیے کہ جنگ کی ذمہ داری بھارت پر ہو گی۔  

تارڑ نے کہا کہ پاکستانی قوم اپنی خودمختاری اور علاقائی سالمیت کا ہر قیمت پر دفاع کرے گی۔