عمران خان کی اسپتال منتقلی کیخلاف حکومت نے دوسری درخواست دائر کردی

وزیراعظم کے مشیر برائے سیاسی امور رانا ثناء اللہ نے کہا ہے کہ حکومت نے عمران خان کو شفا انٹرنیشنل ہسپتال منتقل کرنے سے متعلق سپریم کورٹ کے فیصلے کے خلاف نظرثانی درخواست دائر کردی ہے۔

اسلام آباد میں صحافیوں سے گفتگو کرتے ہوئے رانا ثناء اللہ کا کہنا تھا کہ عمران خان کو ہسپتال منتقل کرنے کے لیے فی الحال کوئی حتمی مدت مقرر نہیں کی گئی۔ حکومت نے نظرثانی درخواست دائر کردی ہے اور امید ہے کہ عدالت اس پر آج یا کل فیصلہ دے گی۔

انہوں نے کہا کہ حکومت آئین اور قانون کی پابند ہے اور سپریم کورٹ کے فیصلوں پر عمل کرنا اس کی ذمہ داری ہے، تاہم حکومت سمجھتی ہے کہ اس فیصلے کے فوجداری نظام پر دور رس اثرات مرتب ہوسکتے ہیں۔

رانا ثناء اللہ نے سوال اٹھایا کہ اگر ایک قیدی کو نجی ہسپتال منتقل کرنے کی اجازت دی جاتی ہے تو مستقبل میں دیگر قیدی بھی اسی بنیاد پر ایسی درخواستیں دائر کرسکتے ہیں، جس سے ماتحت عدالتوں کے لیے مشکلات پیدا ہوں گی۔

انہوں نے سابق وزیراعظم نواز شریف کا حوالہ دیتے ہوئے کہا کہ انہیں جیل سے سرکاری ہسپتال منتقل کیا گیا تھا اور بعد میں میڈیکل بورڈ کی سفارش پر بیرون ملک علاج کی اجازت دی گئی۔

حکومت اور اپوزیشن میں مذاکرات

دوسری جانب حکومت اور اپوزیشن کے درمیان مذاکرات کے حوالے سے رانا ثناء اللہ نے کہا کہ وزیراعظم شہباز شریف نے ایک مرتبہ پھر بات چیت کی پیشکش کی ہے۔

ان کے مطابق اپوزیشن رہنما بیرسٹر گوہر بھی مذاکرات کے لیے تیار ہیں اور انہوں نے خود بھی اپوزیشن کو بات چیت کے لیے وقت طے کرنے کی پیشکش کی ہے۔

رانا ثناء اللہ کا کہنا تھا کہ سیاسی معاملات کا حل مذاکرات کے ذریعے ہی نکالا جاسکتا ہے اور حکومت اپوزیشن سے بات چیت کے لیے تیار ہے۔