مصطفی قتل کیس کے بعد ڈی ایچ اے کے رہائشیوں کا خط، سخت کارروائی کا مطالبہ

ڈی ایچ اے کے رہائشیوں نے مصطفی عامر کے قتل کے بعد ڈی جی رینجرز، آئی جی سندھ، اور اسٹیشن کمانڈر ڈی ایچ اے کراچی سمیت دیگر اعلیٰ حکام کو خط ارسال کیا ہے۔ 

خط میں ڈی ایچ اے رولز کی خلاف ورزی کے الزامات پر ارمغان قریشی کے والد کامران اصغر قریشی کے خلاف کارروائی کا مطالبہ کیا گیا ہے۔ 

اس کے علاوہ، بنگلہ نمبر 35 کے اصل مالک کو بھی سامنے لانے کی درخواست کی گئی ہے، جو ارمغان کے زیر استعمال تھا۔

رہائشیوں نے اپنے خط میں بتایا کہ حالیہ واقعات کی وجہ سے انہیں سیکیورٹی کے شدید خدشات لاحق ہوگئے ہیں۔

 انہوں نے مطالبہ کیا کہ کامران اصغر قریشی کو بنگلہ خالی کرنے کا حکم دیا جائے۔ خط میں یہ بھی کہا گیا کہ ارمغان کے زیر استعمال بنگلے سے کئی بار ہوائی فائرنگ کے واقعات پیش آئے ہیں، جس کی وجہ سے علاقے میں خوف و ہراس پھیل گیا۔ مزید یہ کہ 2023 سے 2024 کے دوران بنگلے میں غیر قانونی طور پر شیروں کو بھی رکھا گیا تھا۔

خط میں یہ بھی بتایا گیا کہ ارمغان قریشی 100 سے زائد پرائیوٹ سیکیورٹی گارڈز رکھتا تھا، اور وہ اپنے گارڈز کے ذریعے خواتین اور گھریلو ملازمین کو ہراساں کرنے میں ملوث تھا۔ 8 فروری کو بنگلے میں ارمغان اور پولیس کے درمیان فائرنگ کا تبادلہ ہوا، جس کی وجہ سے دیگر رہائشیوں کو اپنے گھروں میں محصور ہونا پڑا۔ رہائشیوں نے مطالبہ کیا کہ اس طرح کے واقعات کو روکنے کے لیے فوری اقدامات کیے جائیں۔