پاکستانی شہری آصف بشیر دوران حج جان بچانے پر بھارتی سول ایوارڈ کیلئے نامزد

پاکستانی شہری آصف بشیر، جنہوں نے 2024 کے حج کے دوران شدید گرمی کے دوران 17 ہندوستانیوں سمیت 26 جانیں بچائیں،انہیں ہندوستان کے ممتاز سول ایوارڈ کے لیے نامزد کیا گیا ہے۔

اطلاعات کے مطابق بھارتی حکومت نے آصف بشیر کو 26 جنوری کو ایوارڈ وصول کرنے کی دعوت دی ہے۔

اس اعلان کے بعد وزیراعظم شہباز شریف نے ڈائریکٹر جنرل حج اور وزارت مذہبی امور کو کاغذات نامزدگی جمع کرانے کی ہدایت کی، جس میں توقع ہے کہ آصف بشیر کا نام ان کی حج کے دوران جان بچانے کی کوششوں پر شامل ہوگا۔

خیبر پختونخواہ سے تعلق رکھنے والے آصف بشیر منیٰ میں حج کے دوران اسسٹنٹ کے طور پر خدمات انجام دے رہے تھے، جہاں بہت سے عازمین کو شدید گرمی کا سامنا کرنا پڑا۔

پشاور سے تعلق رکھنے والے 32سالہ شہری وزیر اعلی سیکرٹریٹ خیبر پختونخوا میں بطور ڈیٹا بیس سپروائزر کام کرتا ہے، اسے 2024 میں حجاج کرام کی مدد کے لیے بطور رضاکار حج ادا کرنے کی سعادت بھی حاصل ہوئی۔

تفصیلات کے مطابق نوجوان نے شدید موسمی حالات میں زائرین کو پانی اور جان بچانے والی ادویات فراہم کیں۔

اے پی پی کی خبر کے مطابق، بشیر نے کئی حاجیوں کو اپنے کندھے پر لے کر تین سے چار کلومیٹر کا فاصلہ طے کیا۔ ہندوستانی وزرا نے بشیر کو ان کے انسانی جذبے کے تحت لکھے گئے خطوط میں ان کی تعریف کی۔

ہندوستانی وزیر برائے پارلیمانی امور کرن رجو اور خواتین اور بچوں کی ترقی کی وزیر سمرتی ایرانی نے خطوط میں کہا، "آپ کی لگن، ہمدردی اور زائرین کی خدمت کے لیے غیر متزلزل عزم واقعی قابل ستائش ہے۔

انہوں نے کہا کہ جب ایمبولینسز اور طبی عملے کی کمی کا سامنا تھا تو میں آپ کی جانب سے ابتدائی طبی امداد فراہم کرنے اور مریضوں کو ہسپتالوں تک پہنچانے میں آپ کی شفقت اور بہادری سے خاص طور پر متاثر ہوا ہوں۔