اسد قیصر نے پی ٹی آئی چیئرمین نامزد ہونے کی تردید کر دی

پشاور: پاکستان تحریک انصاف (پی ٹی آئی) کے رہنما اسد قیصر نے ان خبروں کی تردید کی ہے جن میں کہا گیا تھا کہ انہیں پی ٹی آئی کے بانی عمران خان نے پارٹی چیئرمین نامزد کردیا ہے۔

اسد قیصر نے واضح کیا کہ پارٹی چیئرمین کے عہدے کے حوالے سے ابھی کوئی فیصلہ نہیں ہوا، ساتھ ہی انہوں نے تصدیق کی کہ سیکرٹری جنرل کے عہدے کا فیصلہ اڈیالہ جیل میں عمران خان سے مشاورت کے بعد کیا جائے گا۔

اس سے قبل میڈیا رپورٹس میں اشارہ دیا گیا تھا کہ اسلام آباد میں پی ٹی آئی کے حالیہ احتجاج کے انتظام سے متعلق تنقید کے بعد عمران خان نے بیرسٹر گوہر علی خان کو پی ٹی آئی چیئرمین اور سیکرٹری جنرل سلمان اکرم راجہ کو ان کے عہدے سے ہٹا دیا ہے۔

سلمان اکرم راجہ، جنہیں ستمبر میں پی ٹی آئی کے سیکرٹری جنرل کے عہدے پر تعینات کیا گیا تھا، نے اپنا استعفی پارٹی قیادت کو پیش کیا تھا، جس کی بعد میں پی ٹی آئی کے چیئرمین بیرسٹر گوہر علی خان نے تصدیق کر دی تھی۔

سلمان اکرم راجہ کو پارٹی کے حالیہ مظاہروں میں شامل نہ ہونے کی وجہ سے خاصی تنقید کا سامنا کرنا پڑا ہے۔