سمندری طوفان شکتی، ماہی گیروں کو سمندر میں نہ جانے کی ہدایت

کراچی: سمندری طوفان شکتی کا دبائو مزید کم ہوگیا، طوفان شمال مغربی بحیرہ عرب میں موجود ہے۔

محکمہ موسمیات کے مطابق سمندری طوفان شکتی اس وقت کراچی سے تقریباً 960 کلومیٹر جنوب مغرب میں ہے، طوفان آئندہ 6 گھنٹوں میں مزید کمزور ہونے کا امکان ہے۔

اگلے 12 گھنٹوں میں ہوا کا کم دبائو بننے کا امکان موجود ہے جبکہ ماہی گیروں کو اگلے 12 گھنٹوں تک گہرے سمندر میں نہ جانے کی ہدایت کی گئی ہے۔

ہوا کی رفتار 70 کلومیٹر فی گھنٹہ تک ریکارڈکی گئی، آئندہ 6 گھنٹوں میں ہوائیں 45 سے 65 کلومیٹر فی گھنٹہ تک کم ہوسکتی ہیں۔

سمندری طوفان شکتی کے اثرات بلوچستان تک پہنچ گئے، وسطی اور شمالی بلوچستان کے کئی علاقے شدید گرد و غبار اور مٹی کے طوفان کی لپیٹ میں آگئے۔

جس کے باعث صوبائی دارالحکومت کوئٹہ میں فضا گرد آلود ہونے سے حدِ نگاہ انتہائی کم ہوگئی، شدید گرد آلود موسم کے باعث شہریوں، خصوصا دمہ اور سانس کے مریضوں کو مشکلات کا سامنا ہے۔

محکمہ موسمیات نے بتایا کہ مکران کی ساحلی پٹی کے قریب سے گزرنے والے سمندری طوفان شکتی کے نتیجے میں ہوائوں کا رخ سمندر کی جانب ہو گیا ہے، جس کے باعث قندھار سے اٹھنے والا گردوغبار وسطی بلوچستان تک پھیل گیاہے۔

محکمہ موسمیات نے کہا کہ آئندہ 24 سے 36 گھنٹوں کے دوران موسم بتدریج صاف ہونا شروع ہو جائے گا تاہم کوئٹہ اور چمن میں خشک اور ٹھنڈی ہوائوں نے موسم کو مزید سرد کر دیا ہے۔