سانحہ گل پلازہ پر بلاول بھٹو شدید نالاں، میئر سمیت کئی افسران کیخلاف کارروائی کا امکان

سانحہ گل پلازہ کے حوالے سے مرتب کی گئی ابتدائی رپورٹ وزیراعلیٰ کو پیش کردی گئی ہے جبکہ بلاول بھٹو نے بھی ناقص کارکردگی پر برہمی کا اظہار کیا ہے، میئر کراچی سمیت کئی افسران کے خلاف کارروائی کا امکان ہے۔

ذرائع کے مطابق گل پلازہ میں پیش آنے والے افسوسناک سانحے سے متعلق تحقیقاتی رپورٹ وزیراعلیٰ سندھ سید مراد علی شاہ کو پیش کر دی گئی ہے۔

ذرائع کا کہنا ہے کہ رپورٹ جمع ہونے کے بعد سندھ حکومت کے متعدد اعلیٰ افسران کی کارکردگی پر سوالات اٹھائے گئے ہیں، جب کہ میئر کراچی مرتضیٰ وہاب کو بھی رپورٹ میں شامل نکات کے باعث مشکلات کا امکان ہے۔

اطلاعات کے مطابق پاکستان پیپلز پارٹی کے چیئرمین بلاول بھٹو زرداری نے واقعے کے بعد صوبائی حکومت کے متعلقہ اداروں اور افسران کی کارکردگی پر عدم اطمینان کا اظہار کیا ہے۔

ذرائع کا کہنا ہے کہ رپورٹ میں انتظامی غفلت اور ذمہ داریوں میں کوتاہی کی نشاندہی کی گئی ہے، جس کے بعد بعض افسران کے خلاف کارروائی کی سفارشات بھی شامل ہیں۔

حتمی فیصلوں سے متعلق وزیراعلیٰ سندھ کی جانب سے مشاورت جاری ہے، جب کہ آئندہ دنوں میں اہم اقدامات کا امکان ظاہر کیا جا رہا ہے۔