سانحہ آرمی پبلک اسکول کو 10 سال بیت گئے، زخم آج بھی تازہ

سانحہ آرمی پبلک اسکول کو گزرے 10 برس بیت گئے مگر والدین کے زخم آج بھی تازہ ہیں۔

آج سے دس برس قبل پشاور میں قائم آرمی پبلک اسکول میں وحشی درندوں نے داخل ہوکر اندھا دھند فائرنگ کر کے اسکول میں تعلیم حاصل کرنے والے معصوم بچوں کو نشانہ بنایا تھا۔

16 دسمبر 2014 پاکستان کی تاریخ کا سیاہ ترین دن تھا جب کالعدم تحریک طالبان پاکستان (ٹی ٹی پی) کے 6 دہشت گردوں نے اے پی ایس پر بزدلانہ کارروائی کرتے ہوئے 132 طالبِ علموں اور عملے کے 17 افراد کو فائرنگ کر شہید کردیا تھا۔

سانحے میں شہید ہونے والے بچوں کے والدین، لواحقین کے 16 دسمبر کو زخم ایک بار پھر تازہ ہوجاتے ہیں اور وہ یاد کرتے ہیں کہ انہوں نے اپنے معصوم بچوں کو اسکول میں تعلیم حاصل کرنے بھیجا تھا۔

سانحے کے بعد قوم نے متحد ہوکر دہشت گردی کو جڑ سے ختم کرنے کا عزم کیا اور پھر دہشت گردوں کے خلاف پاک فوج نے بھرپور کارروائیاں کرتے ہوئے انہیں شکست دی تاہم گزشتہ حکومت کی ناقص پالیسیوں کی وجہ سے دہشت گردوں نے خیبرپختونخوا میں ایک بار پھر قدم جما لیے ہیں۔