1 ہزار روپے کی شرط کیلیے نہر میں کودنے والے 66 سالہ بزرگ ڈوب گئے

بہاولپور کے علاقے اوچ شریف کے قریب ایک دلخراش واقعہ پیش آیا، جہاں 66 سالہ ریٹائرڈ ریلوے ملازم شبیر 1000 روپے کی شرط جیتنے کے لیے عباسیہ لنک نہر میں ڈوب کر جاں بحق ہو گئے۔

ریسکیو 1122 کے ذرائع کے مطابق، شبیر کو مقامی لوگوں نے گہری اور وسیع نہر تیر کر پار کرنے کی شرط لگائی، حالانکہ وہ تربیت یافتہ تیراک نہ تھے۔ شبیر نے چیلنج قبول کیا اور نہر میں چھلانگ لگا دی۔

 عینی شاہدین کے مطابق، جب وہ پانی میں جدوجہد کر رہے تھے، تماشائیوں نے مدد کرنے کے بجائے ہنسی مذاق کیا اور موبائل فون پر ویڈیو بناتے رہے۔

یہ ویڈیو بعد میں سوشل میڈیا پر اپ لوڈ کی گئی، جس پر عوام نے شدید غم و غصے کا اظہار کیا۔

حالت اس وقت سنگین ہوئی جب شبیر پانی میں غائب ہو گئے۔ اس کے بعد ہی کسی نے ریسکیو 1122 کو اطلاع دی، لیکن جب تک ٹیم موقع پر پہنچی، شبیر ڈوب چکے تھے۔ ریسکیو ٹیم نے لاش نکال کر لواحقین کے حوالے کر دی۔

سوشل میڈیا پر اس واقعے کی شدید مذمت کی جا رہی ہے، جہاں لوگوں نے نہ صرف شرط لگانے والوں بلکہ خاموش تماشائیوں کو بھی تنقید کا نشانہ بنایا۔

 بہت سے صارفین نے ملوث افراد کی فوری گرفتاری کا مطالبہ کیا ہے۔ تاہم، عچ شریف پولیس نے اب تک کوئی کارروائی نہیں کی۔