عوام اور سوشل میڈیا پر شدید ردعمل کے بعد علیمہ خان کے بیٹے کی گرفتاری ظاہر

لاہور پولیس نے شدید عوامی ردعمل کے بعد علیمہ خان کے بیٹے شاہ ریز خان کی 9 مئی مقدمے میں گرفتاری ظاہر کردی۔ پولیس نے جمعرات کو تحریک انصاف (پی ٹی آئی) کے بانی عمران خان کی بہن علیمہ خان کے بیٹے شہریار خان کی گرفتاری کی تصدیق کی۔

 ڈی آئی جی انویسٹی گیشن سید ذیشان رضا کے مطابق، شہریار خان کو مئی 9 کے مقدمات کے سلسلے میں مطلوب کیا جا رہا تھا۔

ڈی آئی جی نے کہا کہ "ریاست مخالف سرگرمیوں میں ملوث افراد کسی رعایت کے مستحق نہیں ہیں۔" انہوں نے مزید بتایا کہ ملزم کو جمعہ کی صبح عدالت میں پیش کیا جائے گا۔

اس سے قبل، علیمہ خان نے الزام لگایا تھا کہ چار نقاب پوش مسلح افراد نے ان کے گھر پر دھاوا بولا اور ان کے بیٹے کو زبردستی لے گئے۔ 

انہوں نے دعویٰ کیا کہ سادہ کپڑوں میں ملبوس یہ افراد باورچی خانے کے راستے گھر میں داخل ہوئے جب شہریار اپنی بیوی اور والد کے ساتھ اوپر موجود تھے۔ علیمہ خان کے مطابق، حملہ آوروں نے گھریلو ملازمین کو بھی ہراساں کیا۔

پی ٹی آئی کے ترجمان نے بھی اسی طرح کا بیان جاری کیا، جس میں الزام لگایا گیا کہ نقاب پوش افراد نے شہریار کے دو بچوں کے سامنے بیڈ روم کا دروازہ توڑا، انہیں تشدد کا نشانہ بنایا اور زبردستی اپنے ساتھ لے گئے۔

اس گرفتاری نے سوشل میڈیا پلیٹ فارم ایکس پر شدید غم و غصے کو جنم دیا ہے، جہاں بہت سے لوگوں نے اس اقدام کے وقت پر سوال اٹھائے ہیں۔ 

صارفین کا کہنا ہے کہ شہریار خان سیاست سے دور رہے ہیں، اس کے باوجود مئی 9 کے واقعات کے دو سال بعد انہیں گرفتار کیا گیا۔