بنوں میں امن کمیٹی پر حملہ، رہنماؤں کی شہادت

بنوں کے علاقے ہوید میں امن کمیٹی کے ارکان پر دہشت گردوں کی فائرنگ کے نتیجے میں چار افراد جان سے ہاتھ دھو بیٹھے۔ پولیس کے مطابق یہ واقعہ اس وقت پیش آیا جب امن کمیٹی کے ممبران گلبدین لنڈائی ڈاک میں ہونے والے جرگے میں شرکت کے بعد واپس جا رہے تھے۔

پولیس کا کہنا ہے کہ راستے میں پہلے سے گھات لگائے حملہ آوروں نے امن کمیٹی کے افراد پر اچانک اندھا دھند فائرنگ کر دی، جس کے باعث موقع پر ہی چار افراد جاں بحق ہو گئے۔ جاں بحق ہونے والوں میں باپ اور بیٹا بھی شامل ہیں۔

واقعے کے فوراً بعد پولیس نے علاقے کو گھیرے میں لے کر سرچ آپریشن شروع کر دیا ہے تاکہ ملزمان کا سراغ لگایا جا سکے۔ پولیس کے مطابق جاں بحق افراد کی لاشیں ڈسٹرکٹ ہیڈ کوارٹر اسپتال منتقل کر دی گئی ہیں، جہاں ضروری کارروائی جاری ہے۔

پولیس نے واقعے کی تحقیقات شروع کر دی ہیں جبکہ علاقے میں سیکیورٹی مزید سخت کر دی گئی ہے۔