بنوں میں تھانے کے سامنے دھماکا، شہادتیں

بنوں میں تھانہ میریان پولیس اسٹیشن کے سامنے زور دار دھماکے کے نتیجے میں ایک بچے سمیت دو افراد جاں بحق جبکہ 16 افراد زخمی ہو گئے۔

ابتدائی اطلاعات کے مطابق دھماکہ اچانک ہوا جس کے باعث علاقے میں خوف و ہراس پھیل گیا۔ زخمیوں کو فوری طور پر بنوں کے مختلف اسپتالوں میں منتقل کیا گیا جہاں بعض کی حالت تشویشناک بتائی جا رہی ہے۔

واقعے کی اطلاع ملتے ہی پولیس کی بھاری نفری جائے وقوعہ پر پہنچ گئی جبکہ مزید اہلکاروں کو بھی میریان روانہ کر دیا گیا ہے۔ سکیورٹی فورسز نے علاقے کو گھیرے میں لے کر شواہد اکٹھے کرنا شروع کر دیے ہیں۔

دھماکے کی نوعیت اور وجوہات جاننے کے لیے تحقیقات جاری ہیں۔ حکام کا کہنا ہے کہ مزید معلومات سامنے آنے پر عوام کو آگاہ کیا جائے گا۔