کراچی کے کھلے گٹر میں ایک اور بچی کے گرنے کا واقعہ

شہر قائد کے علاقے لیاری میں ایک اور بچی کے کھلے مین ہول میں گرنے کا واقعہ پیش آیا ہے۔

تفصیلات کے مطابق کراچی کے علاقے لیاری میں وائس چیئرمین کے گھر کے قریب کھلا مین ہول وبال جان بن گیا۔

جمعے کے روز اسکول سے واپس آتے ہوئے بچی وائس چیئرمین اقبال ہنگورو کے گھر کے قریب کھلے گٹر میں گر گئی۔

خوش قسمتی سے وہاں پر موجود لوگوں نے اپنی مدد آپ کے تحت بچی کو گٹر سے نکالا تاہم وہ اس واقعے میں معمولی زخمی ہوئی ہے۔

واضح رہے کہ اس سے قبل ڈپٹی میئر کراچی عبداللہ مراد کے حلقے میں دو بچے کھلے گٹر میں گر کر جاں بحق ہوچکے ہیں۔ اس پر میئر کراچی مرتضیٰ وہاب نے گٹر کے ڈھکنے چرانے کا الزام ہیرونچیوں پر عائد کیا اور بچوں کے قتل کا ذمہ داری بھی نشیئوں کو قرار دیا تھا۔