کراچی میں ڈکیتی مزاحمت پر 14 سالہ حافظ قرآن بچہ جاں بحق

کراچی کے علاقے اورنگی ٹاؤن میں موبائل فون چھیننے کی واردات کے دوران مزاحمت پر ڈاکوؤں نے فائرنگ کر کے 14 سالہ لڑکے کو قتل کر دیا۔ یہ افسوسناک واقعہ گلشن بہار کے علاقے میں پیش آیا، جہاں مقتول کی شناخت حسین کے نام سے ہوئی ہے، جو موقع پر ہی دم توڑ گیا۔

حسین کے چچا کے مطابق، وہ مسجد کے باہر بیٹھا ہوا تھا کہ اسی دوران دو مسلح ملزمان آئے اور اس سے موبائل چھیننے کی کوشش کی۔ حسین نے مزاحمت کی اور فرار ہوتے ہوئے ایک ڈاکو کو پکڑ لیا، جس پر اسے گھسیٹ کر فائرنگ کر دی گئی۔

حسین حافظِ قرآن تھا اور عالمِ دین بننے کے لیے دینی تعلیم حاصل کر رہا تھا۔

پولیس کے مطابق، واقعے کے دوران ایک قریبی شہری نے فائرنگ کی، جس کے نتیجے میں ایک ملزم ہلاک ہو گیا جبکہ دوسرا زخمی ہو کر فرار ہونے میں کامیاب ہو گیا۔

ایس ایس پی ویسٹ کے ترجمان کے مطابق، ہلاک ہونے والے ملزم کی شناخت کا عمل جاری ہے اور قانونی کارروائی مکمل کی جا رہی ہے۔ پولیس حکام کا کہنا ہے کہ واقعے کی ہر پہلو سے جامع تفتیش کی جا رہی ہے تاکہ انصاف کو یقینی بنایا جا سکے۔

سرکاری اعداد و شمار کے مطابق، رواں سال کراچی میں ڈکیتی مزاحمت پر جاں بحق ہونے والوں کی تعداد 33 ہو گئی ہے۔