کراچی میں کریک ڈاون، 17 ہزار سے زائد موٹر سائیکلیں ضبط

سندھ حکومت کی جانب سے ٹریفک قوانین کی خلاف ورزیوں کے خلاف کریک ڈاؤن بھرپور انداز میں جاری ہے۔ صوبائی وزیر اطلاعات و ٹرانسپورٹ شرجیل انعام میمن کے مطابق اب تک مجموعی طور پر 17,980 موٹر سائیکلیں ضبط کی جا چکی ہیں۔

کریک ڈاؤن کے دوران فینسی نمبر پلیٹس، ٹنٹڈ گلاس اور دیگر غیر قانونی لوازمات کے خلاف 1,295 کارروائیاں عمل میں لائی گئیں۔ علاوہ ازیں، 308 ہیوی اور لائٹ ٹرانسپورٹ گاڑیاں بھی ضبط کی گئیں۔

شرجیل میمن کا کہنا ہے کہ 230 گاڑیوں کی رجسٹریشن عارضی طور پر معطل کر کے انہیں مخصوص شرائط کے تحت چھوڑا گیا، جن میں تکنیکی بہتری، فٹنس سرٹیفکیٹ کی تجدید اور دیگر تقاضے شامل ہیں۔

انہوں نے کہا کہ ٹریفک بے ضابطگیوں سے شہریوں کی جانوں کو خطرہ لاحق ہوتا ہے اور یہ کریک ڈاؤن شہریوں کی جان و مال کے تحفظ کے لیے حکومت کے عملی اقدامات کا ثبوت ہے۔ ان کا مزید کہنا تھا کہ ٹریفک قوانین کی خلاف ورزی صرف معمولی جرم نہیں بلکہ اجتماعی سلامتی کے لیے سنگین خطرہ ہے۔

شرجیل میمن نے واضح کیا کہ کارروائیاں بلا تفریق جاری رہیں گی اور قانون کی خلاف ورزی کسی صورت برداشت نہیں کی جائے گی۔ انہوں نے شہریوں سے اپیل کی کہ قانون نافذ کرنے والے اداروں سے مکمل تعاون کریں اور غیر قانونی لوازمات سے گریز کریں۔

صوبائی وزیر نے عندیہ دیا کہ یہ مہم صرف آغاز ہے، اور آنے والے دنوں میں مزید سخت اقدامات کیے جائیں گے۔