کراچی میں خواتین کا جنسی استحصال کرنے والا جعلی پیر گرفتار

شہر قائد کے علاقے کورنگی میں پولیس نے خواتین کا جنسی استحصال کرنے والے جعلی پیر کو گرفتار کرلیا۔

تفصیلات کے مطابق کورنگی کے علاقے عوامی کالونی میں موجود جعلی پیر کے آستانے کی ایک ویڈیو وائرل ہوئی جس میں وہ خواتین کا جنسی استحصال کررہا تھا۔

باریش اور ادھیڑ عمر کے جعلی پیر نے خواتین کے جسم کو نہ صرف چھوا بلکہ حرکتیں بھی کیں اور یہ تمام مناظر کیمرے کی آنکھ میں محفوظ ہوگئے تھے۔

اس ویڈیو پر ایس ایس پی کورنگی نے نوٹس لیتے ہوئے ملزم کی گرفتاری کی ہدایت کی جس پر پولیس نے کارروائی کر کے عوامی کالونی سے جعلی پیر کو گرفتار کرلیا۔

ایس ایس پی نے بتایا کہ ملزم کے خلاف کسی قسم کی کوئی شکایت موصول نہیں ہوئی تاہم ویڈیو کی بنیاد پر اس کے خلاف سرکار کی مدعیت میں مقدمہ درج کیا جائے گا۔

انہوں نے یقین دہانی کراوائی کہ ملزم کو مضبوط چالان کے ساتھ عدالت میں پیش کر کے قرار واقعی سزا دلوائی جائے گی۔ ایس ایس پی کورنگی نے یہ بھی کہا کہ خواتین، بچوں کا جنسی استحصال کرنے والے درندے کسی بھی طور پر رحم کے مستحق نہیں ہیں اور پولیس ایسے ملزمان کے خلاف سخت کارروائی کرتی رہے گی۔