کراچی میں ماں باپ کا اکلوتا بیٹا ڈکیتی مزاحمت پر جاں بحق، تعداد 22 ہوگئی

کراچی میں ڈاکو راج جاری ہے اور کورنگی میں مسلح افراد نے مزاحمت پر ایک اور نوجوان کی زندگی چھین لی۔

تفصیلات کے مطابق کورنگی میں منگل کی شب ڈاکوؤں نے لوٹ مار کے دوران میڈیکل اسٹور کے مالک اور والدین کی اکلوتی اولاد کو سفاکانہ فائرنگ کا نشانہ بنا کر ابدی نیند سلا دیا۔

مقتول کی شناخت 22 سالہ صہیب کے نام سے ہوئی جو بسم اللہ میڈیکل اسٹور چلا رہا تھا۔ عینی شاہدین کے مطابق ڈکیت لوٹ مار کے بعد جارہے تھے کہ اس دوران لوگوں نے شور مچایا تو ملزم نے فائرنگ کردی جس کے نتیجے میں گولی متوفی کے کاندھے میں لگی اور وہ اسپتال منتقلی کے دوران دم توڑ گیا۔

اس سے دو روز قبل کورنگی میں ڈکیتوں نے سیکیورٹی گارڈ سمیت دو افراد کو ابدی نیند سلادیا تھا۔

دوسری جانب رواں سال کے دوران شہر کے مختلف علاقوں میں سفاک ڈاکوؤں کی فائرنگ کا نشانہ بن کر مجموعی طور پر 22 افراد زندگی کی بازی ہار چکے ہیں۔ اس کے علاوہ یومیہ بنیاد پر درجنوں شہری لوٹ مار کے دوران مزاحمت پر ڈاکوؤں کی فائرنگ سے زخمی اور اپنے قیمتی مال سے محروم ہورہے ہیں۔