کراچی میں شوہر اور دیور نے خاتون کو بے دردی سے قتل کردیا

اورنگی ٹاؤن ایم پی آرکالونی میں شوہر نے مبینہ طور پر اپنے بھائیوں کے ساتھ ملکر غیرت کے نام پر بیوی کو قتل کردیا۔ پولیس نے ایک ملزم کو گرفتار کرلیا جبکہ خاتون کا شوہر اور اسکا ایک دیور فرار ہوگئے۔

ایکسپریس نیوز کی رپورٹ کے مطابق مقتولہ خاتون گھر میں سوئی ہوئی تھی جب اسکو بغدے اور ہتھوڑے کے وار کرکے قتل کیا گیا۔ خاتون کی لاش قانونی کارروائی کے لیےعباسی شہید اسپتال منتقل کی گئی۔ مقتولہ خاتون کی شناخت 35 سالہ عاصمہ زوجہ حفیظ اللہ کے نام سے کی گئی،مقتولہ خاتون 2 بچوں کی ماں تھی۔

رپورٹ کے مطابق ایس ایچ اواورنگی ٹاؤن جمال لغاری کا کہنا ہے کہ مقتولہ خاتون کو اس کے 2 دیوروں عنایت شاہ اور نیئر شاہ نےغیرت کے نام پر قتل کیا،خاتون کے قتل میں اس کا شوہر حفیظ اللہ بھی ملوث ہے۔ مقتولہ خاتون کے شوہر نے ہی ملزمان کو اپنے گھر کی چابی دی تھی۔

پولیس نے فوری کارروائی کرتے ہوئےخاتون کے قتل میں ملوث ایک دیورعنایت ولد سمن شاہ کوگرفتارکرکے آلہ قتل برآمد کرلیا،خاتون کےقتل میں ملوث ایک دیورنیئراورخاتون کا شوہر حفیظ فرار ہوگئے ہیں جن کی گرفتاری کے لیے چھاپے مارے جا رہے ہیں۔