کیبل لفٹ میں پھنسے بچے کو بچانے کے دوران باپ نے اپنی جان دے دی

خیبرپختونخوا کے علاقے شانگلہ میں کیبل لفٹ کو حادثہ پیش آیا جس میں اپنے پھنسے ہوئے بچے کو بچانے کے دوران باپ دریا میں گر کر جاں بحق ہوگیا۔

اطلاعات کے مطابق کیبل لفٹ حادثہ بٹگرام اور شانگلہ کے درمیان پیش آیا، لفٹ درمیان میں پہنچ کر پھنس گئی تھی جس میں بارہ سالہ یاسین سوار تھا۔ 

پولیس کے مطابق اس لفٹ سے مقامی افراد روزانہ دریا پار کرتے ہیں اور یاسین بھی معمول کے مطابق اسکول سے واپس گھر جارہا تھا جبکہ اُس کا والد دریا کے دوسری طرف کھڑا اُسے دیکھ رہا تھا۔

اس دوران لفٹ درمیان میں جاکر پھنسی تو باپ اپنے جگر گوشے کو مشکل میں دیکھ کر کھڑا ہوا اور رسی پر لٹک کر اُس کے قریب پہنچنے کیلیے چل پڑا تاہم درمیان میں رسی ٹوٹ گئی جس کے باعث وہ دریائے سندھ میں جاگرا ۔

دریا کے تیز بھاؤ میں متوفی اپنا حواس بھال نہ رکھ سکا اور موت کو گلے لگا لیا، لفٹ میں پھنسے بچے نے اپنی آنکھوں سے یہ منظر دیکھا۔ واقعے کے بعد پولیس اور علاقہ مکینوں نے دریا سے متوفی کی لاش نکال لی۔

ریسکیو حکام کے مطابق لفٹ میں پھنسے ہوئے بچے کو مقامی افراد نے باحفاظت نکال کر گھر پہنچا دیا تاہم ناگہانی موت پر اہل خانہ غم سے نڈھال ہیں۔ متوفی کی شناخت عزیز کے نام سے ہوئی۔