میٹرک کی طالبہ کو ہراساں کرنے والا بائیک رائیڈر گرفتار

لاہور میں میٹرک کی طالبہ کو جنسی طور پر ہراساں کرنے والا رائیڈر پولیس کی کارروائی کے دوران حراست میں لے لیا گیا۔

ترجمان پولیس کے مطابق ایس ایچ او گلبرگ نے جدید ٹیکنالوجی کی مدد سے ملزم کا سراغ لگایا اور نور جہاں روڈ سے اسے گرفتار کیا۔ اس واقعے پر ڈی آئی جی آپریشنز کے نوٹس کے بعد ایس پی شہربانو نقوی کی سربراہی میں ایک خصوصی ٹیم بھی تشکیل دی گئی تھی۔

تفصیلات کے مطابق متاثرہ طالبہ نے جوہر ٹاؤن سے نجی ہاؤسنگ سوسائٹی جانے کے لیے ان رائیڈ سروس بک کی تھی، مگر ملزم اسے اصل راستے سے ہٹا کر گلبرگ کے علی زیب روڈ کی طرف لے گیا، جہاں پارک کے قریب اس نے لڑکی کو ہراساں کرنے کی کوشش کی۔ اے ایس پی گلبرگ نے بتایا کہ رائیڈر نے دھوکے سے راستہ تبدیل کیا اور طالبہ کو تنہا مقام پر لے جا کر اسے پریشان کرتا رہا۔

پولیس کے مطابق ملزم شعیب کے خلاف باقاعدہ مقدمہ درج کرلیا گیا ہے اور اسے مزید کارروائی کے لیے انویسٹی گیشن ونگ کے حوالے کر دیا گیا ہے۔ حکام نے واضح کیا ہے کہ خواتین کو ہراساں کرنے والے عناصر کے خلاف زیرو ٹالرنس پالیسی پر سختی سے عمل کیا جائے گا۔