نند کو شادی پر سونے کی انگوٹھی اور ٹی وی کا تحفہ، بیوی نے شوہر کو قتل کروادیا

بھارت میں ایک خاتون نے نند کو شادی پر سونے کی انگوٹھی اور ٹی وی کا تحفہ دینے پر شوہر کو قتل کروادیا۔

بھارتی ریاست اترپردیش کے 35 سالہ رہائشی چندر پرکاش مشرا نے اپنی بہن کو شادی پر سونے کی انگوٹھی اور ٹی وی کو تحفہ دینے کا فیصلہ کیا اور پھر اس کا مشورہ اپنی اہلیہ سے کیا۔

بیوی چھبی نے شوہر کے فیصلے کی مخالفت کی اور پھر دونوں میں جھگڑا ہوگیا تاہم پرکاش نے اپنی بہن کی خوشی کے لیے اپنی بات کو مکمل کیا اور اُسے تحفے میں انگوٹھی و ٹی وی دے دیا۔

اُدھر ناراض بیوی نے اپنے بھائیوں کو فون کر کے صورت حال بتائی اور اُن سے شوہر کو سبق سکھانے پر اتفاق کیا۔

خاتون کے بھائیوں نے گھر پہنچ کر اپنے بہنوئی کو ایک گھنٹے تک ڈنڈوں سے تشدد کا نشانہ بنایا اور اس دوران چوٹ سر پر لگانے کی وجہ سے وہ بے ہوش ہوگیا جس کے بعد ملزمان اور خاتون موقع سے فرار ہوگئے جبکہ لڑکے کے گھر والوں نے اُسے تشویشناک حالت میں اسپتال منتقل کیا۔

اسپتال منتقلی کے بعد علاج کے دوران ہی چندر پرکاش مشرا کی موت واقع ہوگئی جس پر اہل خانہ پر قیامت ٹوٹ پڑی اور انہوں نے پولیس کو سارے واقعے سے آگاہ کیا۔

پولیس نے واقعے کی اطلاع ملنے کے بعد ملزمہ اور اُس کے بھائیوں سمیت پانچ افراد کو گرفتار کر کے تحقیقات شروع کردیں۔