سندھ میں آج سے 3 مئی تک ہیٹ ویو

محکمہ موسمیات نے سندھ کے مختلف علاقوں میں گرمی کی شدت بڑھنے کے پیش نظر ہیٹ ویو کا الرٹ جاری کر دیا ہے، جس کے مطابق آج سے 3 مئی تک بالائی اور وسطی اضلاع شدید گرمی کی لپیٹ میں آ سکتے ہیں۔

محکمہ موسمیات کا کہنا ہے کہ اس دوران صوبے کے بیشتر علاقوں میں موسم گرم اور خشک رہے گا، جبکہ کئی شہروں میں درجہ حرارت معمول سے نمایاں حد تک زیادہ رہنے کا امکان ہے۔ متاثرہ علاقوں میں جامشورو، دادو، بے نظیر آباد، کشمور، گھوٹکی، سانگھڑ، خیرپور، نوشہرو فیروز، جیکب آباد، لاڑکانہ اور سکھر شامل ہیں، جہاں دن کے وقت درجہ حرارت معمول سے 4 سے 6 ڈگری سینٹی گریڈ زیادہ رہ سکتا ہے۔

محکمہ موسمیات نے خبردار کیا ہے کہ گرمی کی اس لہر کے دوران خواتین، بچوں اور بزرگوں کو خاص احتیاط کی ضرورت ہے۔ شہریوں کو ہدایت کی گئی ہے کہ وہ دوپہر کے اوقات میں بلا ضرورت گھروں سے باہر نہ نکلیں اور پانی کا زیادہ استعمال کریں۔

ادھر کراچی میں بھی آئندہ چند روز کے دوران گرم دن متوقع ہیں، جہاں درجہ حرارت 36 ڈگری سینٹی گریڈ تک جا سکتا ہے۔ تاہم شہر ہیٹ ویو سے متاثرہ علاقوں میں شامل نہیں ہے۔

محکمہ موسمیات کے مطابق کراچی میں ہوا میں نمی کا تناسب 60 فیصد تک پہنچنے کے باعث گرمی کی شدت اصل درجہ حرارت سے زیادہ محسوس کی جا سکتی ہے۔