’صرف گولی مارنا اور لاش کی بےحرمتی نہ کرنا‘ : غیرت کے نام پر قتل ہونے والی بلوچ خاتون کے آخری الفاظ

بلوچستان میں ایک مرد اور خاتون کے بہیمانہ قتل کی ایک ویڈیو سوشل میڈیا پر وائرل ہونے کے بعد وزیراعلیٰ میر سرفراز بگٹی نے واقعے کا سخت نوٹس لیتے ہوئے فوری تحقیقات اور ملزمان کی گرفتاری کا حکم دے دیا ہے۔

یہ لرزہ خیز ویڈیو جس میں مسلح افراد کو ایک جوڑے کو فائرنگ کر کے قتل کرتے دیکھا جا سکتا ہے، صوبے بھر میں تشویش کی لہر دوڑا دی ہے۔

"صرف گولی کی اجازت ہے، اس کے علاوہ کچھ نہیں" - متاثرہ خاتون کے آخری الفاظ

سوشل میڈیا پر گردش کرنے والی ویڈیو میں دیکھا جا سکتا ہے کہ چند مسلح افراد ایک پہاڑی مقام پر دو تین گاڑیوں سے اترتے ہیں اور ان کے ساتھ ایک مرد اور ایک خاتون بھی ہوتے ہیں۔

دونوں کو ایک طرف کھڑا کیا جاتا ہے، اور پھر ان پر فائرنگ کر دی جاتی ہے۔ ویڈیو میں متاثرہ خاتون کو براہوی زبان میں یہ کہتے ہوئے سنا جا سکتا ہے کہ "صرف گولی کی اجازت ہے، اس کے علاوہ کچھ نہیں"۔

خاتون کی شناخت شیتل کے نام سے ہوئی اور واقعے کے وقت اُن کے ہاتھ میں قرآن پاک تھا جس پر ہاتھ رکھ کر انہوں نے سب کو یقین دلانے کی کوشش کی کہ انہوں نے نکاح کیا ہے اور کوئی گناہ نہیں کیا مگر قبائلی فرسودہ رسومات کے تحت ایک نہ سنی گئی۔

یہ الفاظ اس وحشیانہ فعل کی سنگینی کو مزید نمایاں کرتے ہیں۔ اگرچہ خیال ظاہر کیا جا رہا ہے کہ یہ واقعہ کوئٹہ کے نواحی پہاڑی علاقے مارواڑ یا ڈیگاری میں پیش آیا ہے، تاہم متعلقہ پولیس تھانے کا کہنا ہے کہ تاحال اس علاقے میں ایسا کوئی واقعہ رپورٹ نہیں ہوا ہے۔

بلوچستان حکومت کے ترجمان شاہد رند کے مطابق وزیراعلیٰ میر سرفراز بگٹی نے قانون نافذ کرنے والے اداروں کو ہدایت کی ہے کہ اس واقعے کی جائے وقوعہ کا تعین کر کے ملزمان کو جلد از جلد قانون کے کٹہرے میں لایا جائے۔

وزیراعلیٰ نے اس طرح کے سفاکانہ واقعات کو انسانی وقار اور معاشرتی اقدار کی توہین قرار دیا ہے اور کہا ہے کہ یہ ناقابل برداشت ہیں۔

انہوں نے واضح کیا کہ ریاست کی عملداری کو چیلنج کرنے والوں کے ساتھ سختی سے نمٹا جائے گا اور کسی کو بھی قانون ہاتھ میں لینے کی اجازت نہیں دی جائے گی۔

ترجمان نے عوام سے بھی اپیل کی ہے کہ وہ ویڈیو میں موجود ملزمان کی شناخت میں مدد کریں تاکہ انہیں گرفتار کیا جا سکے۔ پولیس کی جانب سے ملزمان کی شناخت کے لیے **نادرا سے بھی مدد** لی جا رہی ہے۔

ابھی تک یہ معلوم نہیں ہو سکا ہے کہ یہ واقعہ کب اور کہاں پیش آیا، تاہم بعض سوشل میڈیا صارفین یہ دعویٰ کر رہے ہیں کہ یہ غیرت کے نام پر قتل کا معاملہ ہے اور مقتول مرد اور خاتون نے اپنی مرضی سے شادی کی تھی۔