استری سے دوپٹہ جلنے پر مالکن کا 12 سالہ گھریلو ملازمہ پر وحشیانہ تشدد

کراچی کے علاقے پی ای سی ایچ ایس بلاک 2 میں فلیٹ میں کام کرنے والی 12 سال کی لڑکی پر بہیمانہ تشدد کے الزام میں میاں بیوی کو گرفتار کرلیا گیاہے۔

تفصیلات کے مطابق طارق روڈ میں واقع ایک گھر میں مالکن نے استری کے دوران دوپٹہ جلنے پر 12 سالہ گھریلو ملازمہ زینب کو بدترین تشدد کا نشانہ بنایا ہے۔کمسن بچی کو استری سے جلایا گیا، جس کے نشانات اس کی کمر، بازو اور ٹانگوں سمیت پورے جسم پر واضح ہیں۔

پولیس کے مطابق بچی کو تشویشناک حالت میں جناح اسپتال منتقل کیا گیا، جہاں اس کی حالت تشویشناک ہے۔

واقعے کا مقدمہ فیروزآباد تھانے میں ملازمہ کی والدہ کی مدعیت میں درج کرلیا گیا ہے اور کارروائی کے دوران میاں بیوی، کنول اور شہروز کو گرفتار کرلیا گیا ہے۔

پولیس حکام کے مطابق ابتدائی تفتیش کے مطابق مبینہ طور پر محض ایک دوپٹہ استری کرتے ہوئے جلنے پر بچی کو وحشیانہ تشدد کا نشانہ بنایا گیا۔پولیس حکام کے مطابق واقعے کی مزید تحقیقات کی جارہی ہیں۔