سوات میں قرآن پاک کی توہین پر مشتعل ہجوم نے آگ لگا کر مار ڈالا

خیبرپختونخوا کے مالاکنڈ ڈویژن کی وادی سوات کے علاقے مدین میں مبینہ طور پر ایک شخص نے قرآن مجید کی بے حرمتی کرتے ہوئے اوراق نذر آتش کیے جس پر مشتعل مظاہرین نے اُسے تشدد کر کے مار آگ لگا کر مار ڈالا۔

تفصیلات کے مطابق مدین میں مبینہ طور پر قران شریف کی بے حرمتی کا واقعہ پیش آیا، مقامی افراد نے دعویٰ کیا کہ سیالکوٹ سے تعلق رکھنے والے شخص نے مبینہ طور پر قرآن پاک کے اوراق نذر آتش کیے۔

واقعے کے بعد پولیس نے ملزم کو تحویل میں لے کر تھانے منتقل کیا تو عوام کی بڑی تعداد نے پولیس اسٹیشن مدین پر حملہ کیا اور ملزم کو باہر نکال کر تشدد کا نشانہ بنا کر مار ڈالا جبکہ تھانے کو آگ لگا دی۔

پولیس نے مشتعل مظاہرین کو منتشر کرنے کے لیے فائرنگ کی جس پر مظاہرین نے بھی جوابی پتھراؤ کیا اور علاقے میں شدید کشیدگی پھیل گئی جس پر مدین کا بازار بند ہوگیا۔

ڈی پی او سوات کے مطابق علاقے کے لوگوں نے مشتعل ہوکر سیالکوٹ سے تعلق رکھنے والے شخص کو قرآن مجید کی توہین کے بعد تشدد کا نشانہ بنایا تو مدین پولیس نے گستاخی کرنے والے شخص کو تھانے منتقل کیا، جس پر مشتعل افراد نے پولیس اسٹیشن میں داخل ہوکر ہنگامہ آرائی اور توڑ پھوڑ کی۔

ڈی پی او کے مطابق مشتعل مظاہرین نے ملزم حوالے نہ کرنے پرپولیس گاڑیوں کو بھی نقصان پہنچایا۔ انہوں نے یقین دہانی کرائی کہ قانون ہاتھ میں لینے والے عناصر کے ساتھ سختی سے نمٹا جائے گا اور کسی کو کوئی رعایت نہیں دی جائے گی۔