عثمان طارق اور صاحبزادہ فرحان کی تباہ کن کارکردگی، پاکستان نے نمیبیا کو بڑے مارجن سے شکست دے دی

پاکستان نے صاحبزادہ فرحان کی دھواں دھار بیٹنگ اور عثمان طارق کی تباہ کن بولنگ کی بدولت ٹی 20 ورلڈکپ کے میچ میں نمیبیا کو یکطرفہ مقابلے کے بعد 102 رنز سے شکست دے دی۔

پاکستان نے پہلے بیٹنگ کرتے ہوئے مقررہ 20 اوورز میں 3 وکٹوں کے نقصان پر 199 رنز بنائے اور نمیبیا کو جیت کیلیے 200 رنز کا ہدف دیا تھا۔

پاکستان کی جانب سے صاحبزادہ فرحان 58 گیندوں پر 100 رنز بناکر نمایاں بلے باز رہے۔ انہوں نے 4 چھکے اور 11 چوکے مارے۔

صائم ایوب 14 اور سلمان علی آغا 38 رنز بناسکے۔ شاداب خان 36 اور خواجہ نافع 5 رنز بناکر ناقابل شکست رہے۔

نمیبیا کے جیک براسیل دو وکٹیں لے کر نمایاں بولر رہے۔

ہدف کے تعاقب میں نمیبیا کی ٹیم 17.3 اوور میں 97 رنز پر ڈھیر ہوگئی، لورین اسٹین کیمپ 23 اور الیکزینڈر بوسنگ 20 رنز بناکر نمایاں بلے باز رہے اس کے علاوہ کوئی بھی بلے باز ڈبل فیگر میں داخل نہ ہوسکا۔

پاکستان کی جانب سے عثمان طارق نے 4، شاداب خان نے تین جبکہ محمد نواز اور سلمان مرزا نے ایک ایک وکٹ حاصل کی۔