آصف علی نے قومی ٹیم میں واپسی کیلئے کمر کس لی

فیصل آباد:قومی کرکٹ ٹیم کے جارح مزاج بلے باز آصف علی نے چیمپئنز کپ میں بہترین کارکردگی دکھا کر قومی ٹیم میں واپسی کا عزم کرلیا۔

نجی چینل سے بات کرتے ہوئے جارح مزاج بلے باز کا کہنا تھا کہ وہ اس ٹورنامنٹ میں اچھا پرفارم کرنے کی مکمل تیاری کے ساتھ یہ سوچ کر آئے ہیں کہ یہاں اچھا پرفارم کریں اور دوبارہ قومی ٹیم میں واپس آئیں۔

اپنی بیٹنگ پوزیشن سے متعلق بات کرتے ہوئے انہوں نے کہا کہ وہ چوتھے نمبر پر بیٹنگ کرتے ہوئے زیادہ بہتر محسوس کرتے ہیں۔آصف علی نے کہا کہ 2018 میں ڈیبیو سے پہلے چوتھے نمبر پر اچھی کارکردگی دکھا کر آیا تھا۔

 انہوں نے کہا کہ جب نمبر چار سے نمبر چھ پر جاتے ہیں تو کافی کچھ تبدیل کرنا پڑتا ہے۔

بلے باز نے کہا کہ جب ڈومیسٹک میں اوپر کے نمبر پر کھیلنے کے بعد انٹرنیشنل میں نیچے کے نمبر پر کھیلتے ہیں تو چیلنجز سامنے آتے ہیں جبکہ انٹرنیشنل کرکٹ میں ہر کھلاڑی کو اپنے مخصوص بیٹنگ نمبر کے مطابق ٹریننگ کرنا ہوتی ہے۔

اْنہوں نے کہا کہ چیمپئنز کپ میں کھلاڑیوں کو اس پوزیشن پر ہی کھلایا جا رہا ہے جہاں انٹرنیشنل میں ان سے کھیلنا ممکن ہوسکتا ہے۔