بابر کی طرح رضوان کو بھی کپتانی کا بھرپور موقع دینا چاہیے، شاہد آفریدی

قومی ٹیم کے سابق کپتان شاہد خان آفریدی نے پی سی بی پر تنقید کے نشتر برساتے ہوئے کہا ہے کہ اب پی سی بی کو ایک مستقل چیئرمین کی ضرورت ہے۔

کراچی کے مقامی ہوٹل میں ایک تقریب کے دوران گفتگو کرتے ہوئے آفریدی نے دورہ نیوزی لینڈ کیلیے قومی ٹیم میں ہونے والی تبدیلیوں پر سلیکشن کمیٹی پر تنقید کی۔

انہوں نے کہا کہ نیوزی لینڈ دورے کیلیے چند میچز کھیلنے والوں کو سیریز میں شامل کرلیا ہے، جس کھلاڑی کو دیکھو شاہد آفریدی بننے کی کوشش کررہا ہے۔

انہوں نے کہا کہ اب وقت آگیا ہے کہ پی سی بی کو ایک مستقل چیئرمین دیا جائے تاکہ کرکٹ کا کچھ بھلا ہو۔

شاہد خان آفریدی نے کہا کہ مسلسل کرکٹ کھیلنے سے کھلاڑی تھکاوٹ کا شکار ہو جاتے ہیں اس لیے انہیں آرام لازمی دینا چاہیے۔ انہوں نے کہا کہ چاہے وہ بابر اعظم ہو  یا پھر کوئی اور ہو اُس کو آرام کا موقع نہیں ملے گا تو پھر وہ کھلاڑی پرفارمنس نہیں دے سکے گا۔ 

انہوں نے کہا کہ دس سے گیارہ فرسٹ کلاس کھیلنے والوں کو  دورہ نیوزی لینڈ  پر بھیج دیا گیا،شاہد خان آفریدی نے پاکستان ٹیم کی سلیکشن پر بھی سخت تنقید کرتے ہوئے کہا کہ جہاں اسپنر کی ضرورت تھی وہاں پیسر بھر دیے،اپنے دور کے معروف بیٹسمین، سابق ٹیسٹ کپتان اور بیٹنگ کوچ محمد یوسف کھلاڑیوں کو آف اسپن بولنگ پر کھیلنا سیکھا رہے ہیں،پاکستان ٹیم کے لیول پر سیکھایا نہیں جاتا۔

انہوں نے کہا کہ عثمان خان اور محمد حسنین جیسے باصلاحیت کرکٹرز کو موقع نہیں دیا جارہا،کافی عرصے سے ان کھلاڑیوں کو بینچ پر بیٹھا رکھا ہے۔ 

آفریدی نے کہا کہ پاکستان کرکٹ کو صرف مستقل  کوچ ہی نہیں بلکہ پی سی بی کو بھی ایک مستقل چیئرمین کی ضرورت ہے، بابراعظم کو کپتانی کے بھرپور مواقع دیے گئے،یہ اچھا اقدام تھا۔

انہوں نے کہا کہ رضوان کو صرف چھ ماہ کی کپتانی سونپی گئی۔ آفریدی نے کہا کہ پاکستان میں ٹیلنٹ بہت ہے ضائع بھی اس ہی حساب سے ہورہا ہے، ڈومیسٹک کے اچھے پرفارمر کو موقع دینے کی بات کی تھی، پاکستان ٹیم سیکھنے سکھانے کی جگہ نہیں ہے ، ہمارے ملک میں کوئی نظام نہیں، دیگر ممالک میں  ایک نظام کے تحت لوگ آتے ہیں۔

انہوں نے کہا کہ میں نے ہمیشہ کہا بنچ اسٹرنتھ ہونی چاہئیے، ایسا نہیں ہونا چاہئیے کہ  کہ شاہین اگر ٹیم میں نہ ہو تو اس کی کمی محسوس ہو،  کھیل  میں چھکا چوکا اچھی چیز ہے مگر جسے دیکھو شاہد آفریدی بنا ہوا ہے ، بیٹر کو وقت کی نزاکت کے مطابق سنگل اور ڈبلز بھی بنانے ہوتے ہیں۔