گوہاٹی: ٹیسٹ کرکٹ کی تاریخ میں پہلی بار کیا ہونے جارہا ہے ؟

 گوہاٹی: ٹیسٹ کرکٹ کی تاریخ میں پہلی بار کھانے کے وقفے سے پہلے چاے کا وقفہ کرنے کا فیصلہ کیا گیا ہے۔

میڈیارپورٹ کے مطابق ایک غیر معمولی اور تاریخی فیصلے کے تحت، ٹیسٹ کرکٹ میں کھانے اور چائے کے وقفوں کی روایتی ترتیب میں تبدیلی کا فیصلہ کیاگیا ہے ۔

بھارتی میڈیا کے مطابق صرف بھارت اور جنوبی افریقا کے درمیان 22 نومبر کو گوہاٹی میں کھیلے جانے والے سیریزکے دوسرے ٹیسٹ میں پہلی بار 'چائے کا وقفہ' دوپہر کے کھانے کے وقفے سے پہلے ہوگا۔

بھارتی میڈیا کے مطابق یہ فیصلہ مشرقی بھارتی خطے میں سورج کے جلد طلوع اور جلد غروب ہونے کے باعث کیا گیا ہے۔ بھارتی میڈیا کے مطابق گوہاٹی میں سورج دیگر بھارتی مقامات کے مقابلے میں بہت پہلے طلوع اور غروب ہو جاتا ہے۔

ٹیسٹ میچ میں دن کے 90 اوورز مکمل طور پر قدرتی روشنی میں کھیلے جا سکیں اس لیے بھارتی اور جنوبی افریقی کرکٹ بورڈ نے باہمی رضامندی سے سیشن ٹائمنگ میں تبدیلی کا فیصلہ کیا ہے۔

نئے شیڈول کے مطابق 22 نومبر کو جنوبی افریقا اور بھارت کے درمیان ٹیسٹ میچ کا آغاز صبح 9 بجے ہوگا (جو عام وقت ساڑھے نو بجے سے آدھا گھنٹہ پہلے ہے)۔

بھارتی میڈیا کے مطابق ٹیسٹ میچ کا پہلا سیشن صبح 9 بجے سے 11 بجے تک ہوگا جس کے بعد 11 سے 11 بج کر 20 منٹ تک چائے کا وقفہ ہوگا۔

دوسرا سیشن 11:20 سے دوپہر 1:20 تک ہوگا جس کے بعد 2 بجے تک کھانے کا وقفہ ہوگا۔ اس کے بعد تیسرا سیشن 2 سے 4 بجے تک ہوگا۔یوں کھیل غروبِ آفتاب سے پہلے مکمل ہو جائے گا۔