کیون پیٹرسن کرکٹ میں پیسے کی ریل پیل پر پھٹ پڑے

لندن : سابق انگلش کرکٹر کیون پیٹرسن نے کلکتہ ٹیسٹ میں بھارت کی شکست اور پیسے کی ریل پیل پر تلملا اٹھے ۔

سابق انگلش کرکٹر کیون پیٹرسن نے ایک انٹرویومیں کہا کہ کلکتہ ٹیسٹ کا رزلٹ ماڈرن ڈے کرکٹ کا ہی نتیجہ ہے، بلے باز اب چھکے مارتے اور سوئچ ہٹ کھیل کر ہی بڑے ہورہے ہیں، بیٹرز کو اننگز لمبی کرنا اور مشکل حالات میں میچ بچانا نہیں سکھایا جا رہا۔

کیون پیٹرسن نے کہا کہ اس میں کھلاڑیوں کا قصور نہیں کیونکہ ماڈرن کرکٹ ایسی ہی ہے، آج کل کھلاڑیوں کی ترجیح کریز پر کھڑے رہنا یا اسپن کو کھیلنے کی آرٹ سیکھنا نہیں ہوتا، کرکٹ اب اونچا میوزک،لائٹس،کرکٹ بورڈز اور نجی مالکان کے مالی فائدوں کا کھیل ہے۔

اُنہوں نے کہا کہ اس چیز پر کوئی بات نہیں کرتا کیونکہ ایسا کرنا ممنوع ہے،کھلاڑی جتنا زیادہ پیسا کما سکتے ہیں کمائیں، وہ وہی کررہے ہیں جوفیصلہ ساز کررہے ہیں۔

چھکے اور سوئچ ہٹس مارتے رہو اور اپنا بینک بیلنس بڑھاتے رہو۔ واضح رہے کہ کلکتہ ٹیسٹ میں جنوبی افریقا نے بھارت کو عبرتناک شکست سے دوچار کیا تھا۔

بھارت کلکتہ ٹیسٹ میں جنوبی افریقا کے خلاف بچھائے گئے اپنے ہی جال میں پھنس گیا تھا اور 124 رنز کے ہدف کے تعاقب میں پوری ٹیم 93 رنز پر پویلین لوٹ گئی تھی۔