محسن نقوی نے چیئرمین پی سی بی کا عہدہ چھوڑ دیا؟

لاہور: پاکستان کرکٹ بورڈ (پی سی بی) نے چیئرمین محسن نقوی کے استعفیٰ سے متعلق پھیلائی جانے والی افواہوں کو "بے بنیاد" قرار دے دیا ہے۔  

پی سی بی کی جانب سے جاری کردہ بیان میں ان اطلاعات کی تردید کی گئی ہے جن میں دعویٰ کیا گیا تھا کہ ایشین کرکٹ کونسل (اے سی سی) کے صدر منتخب ہونے کے بعد نقوی اپنے عہدے سے استعفیٰ دے دیں گے۔  

کچھ اسپورٹس ویب سائٹس اور سوشل میڈیا پلیٹ فارمز پر گذشتہ ہفتے کے دوران یہ اطلاعات گردش کر رہی تھیں کہ محسن نقوی، خاص طور پر اے سی سی کی صدارت سنبھالنے کے بعد بڑھتی ہوئی ذمہ داریوں کے پیش نظر پی سی بی چیئرمین کے عہدے سے دستبردار ہو سکتے ہیں۔  

بورڈ کے ایک عہدیدار نے ان اطلاعات کو "بے بنیاد" قرار دیتے ہوئے کہا، "محسن نقوی کے استعفیٰ سے متعلق خبروں میں کوئی حقیقت نہیں۔ وہ پی سی بی چیئرمین کے طور پر اپنے فرائض بخوبی انجام دے رہے ہیں اور پاکستان کرکٹ کی ترقی کے لیے پوری طرح پرعزم ہیں۔"

نقوی، جو شہباز شریف کی قیادت میں بننے والی اتحادی حکومت کے آنے کے بعد سے وزیر داخلہ کے طور پر بھی خدمات انجام دے رہے ہیں، نے کچھ دن قبل اے سی سی کے صدر کی حیثیت سے باضابطہ طور پر ذمہ داریاں سنبھال لی تھیں۔  

عہدیدار نے کہا کہ نقوی کا پی سی بی چیئرمین اور اے سی سی صدر کی حیثیت سے دوہرا کردار کوئی غیر معمولی بات نہیں، اور ان کا مؤثر وقت کا انتظام انہیں دونوں ذمہ داریاں کامیابی سے نبھانے کے قابل بنائے گا۔  

انہوں نے نقوی کی اے سی سی صدارت کو پاکستان کے لیے "اعزاز" قرار دیتے ہوئے واضح کیا کہ نقوی کا پی سی بی کے عہدے سے جانے کا کوئی ارادہ نہیں ہے۔  

اس سے قبل سری لنکا کے شمی سلوا نے دسمبر 2024 سے مارچ 2025 تک صرف تین ماہ کے لیے اے سی سی کے صدر کی حیثیت سے خدمات انجام دی تھیں۔