شاہد آفریدی نے افغانوں کو احسان فراموش قرار دے دیا

کراچی: پاکستان کرکٹ ٹیم کے سابق کپتان شاہد خان آفریدی نے افغانوں کو احسان فراموش قرار دے دیا۔

سماجی رابطے کی ویب سائٹ 'ایکس' پر اپنی پوسٹ میں شاہد آفریدی نے افغانوں کو احسان فراموش قرار دیتے ہوئے کہا کہ 'پاکستان ہمیشہ افغان بھائیوں کے ساتھ کھڑا رہا، افغانوں کی مشکلات کو اپنی مشکل سمجھا'۔

پاکستان کے سابق آل راؤنڈر شاہد آفریدی نے کہا کہ ہم نے افغانوں کیلئے سرحدیں کھولیں، 40 لاکھ افغان مہاجرین کو اپنی سر زمین پر بسایا، ذاتی طور پر اپنے وسائل سے 350 افغان گھرانوں کی دیکھ بھال کرتا ہوں۔

شاہدآفریدی کا کہنا تھا کہ افسوس ہے گزشتہ دنوں افغانستان نے تمام احسانات کو فراموش کردیا، افغانستان نے سرحدوں پر جارحیت کی جس کا ہماری افواج نے بھر پور جواب دیا۔

شاہد آفریدی کا مزید کہنا تھا کہ افغانستان کو سوچنا چاہیے پاکستان اُس کا برادر اسلامی ملک ہے، افغانستان ایسے ملک کے ہاتھوں استعمال نہ ہو جو پہلے ہی  پاکستان میں دہشتگردوں کو تعاون فراہم کر رہا ہے۔