افغانستان میں شدید زلزلے سے 1400 ہلاکتوں کی تصدیق، صورتحال انتہائی نازک

افغانستان کے جنوب مشرقی حصے میں پاکستان کی سرحد کے قریب اتوار کی رات گئے 6.0 شدت کا زلزلہ آیا، جس کے نتیجے میں اموات کی تعداد 1400 سے تجاوز کر گئی ہے۔

امارات اسلامیہ کی حکومت کے مطابق زلزلے کے نتیجے میں سیکڑوں رہائشی عمارتیں، انفراسٹریکچر بری طرح سے متاثر ہوا ہے جس کی وجہ سے امدادی کاموں میں شدید مشکلات کا سامنا ہے۔

ترجمان افغان طالبان نے بتایا کہ ملبہ ہٹنے کے ساتھ لاشیں نکلنے کا سلسلہ جاری ہے اور وقت کے ساتھ ساتھ ان میں اضافہ ہورہا ہے تاہم منگل کی صبح تک 1400 سے زائد لاشیں نکالی گئی ہیں۔

انہوں نے بتایا کہ زلزلے کے وقت گھروں میں لوگ سورہے تھے تو بہت زیادہ جانی نقصان ہوا ہے۔ ذبیح اللہ مجاہد نے اپیل کی کہ عالمی برادری اور بالخصوص اسلامی ممالک مشکل وقت میں افغانستان کا ساتھ دیں۔

وزارت صحت کا حوالہ دیتے ہوئے انہوں نے بتایا کنڑ میں ہزاروں زخمیوں کی وجہ سے طبی سہولیات اور عملہ کم پڑ گیا ہے، جبکہ سیکڑوں افراد کھلے آسمان تلے بیٹھے ہیں جن کیلیے حکومت ہر ممکن انتظام کررہی ہے۔